Tags-Husn

husn hai un meñ tirā mere junūñ kā andāz
phuul bhī le ke ajab shakl o shabāhat aa.e

dil kī āvāz ho mahrūm-e-asar kyā ma.anī
ishq kāfir hai agar husn musalmāñ na huā

ishq har-chand masā.ib se pareshāñ na huā
na huā husn magar tāba-e-farmāñ na huā

tujh ko shikva hai ki ushshāq ne badnām kiyā
sach to ye hai ki tirā husn hai dushman terā

husn-e-takmīl-e-tamannā hai sabā ho jaanā
shahr-dar-shahr har ik dil kī ravā ho jaanā

husn jalva dikhā gayā apnā
ishq baiThā rahā udaas kahīñ

Dhalā hai husn lekin rañg hai ruḳhsār-e-jānāñ par
abhī baaqī hai kuchh kuchh dhuup dīvār-e-gulistāñ par

ye faroġh-e-gulsitāñ hai ki bahār se ayaañ hai
tire husn kī haqīqat mire ishq kā fasāna

tirī hamd kyā kareñge ye bayāñ ye lafz-o-ma.anī
tirā husn bhī anokhā tirī zaat bhī yagāna

husn aur ishq donoñ meñ tafrīq hai par inhīñ donoñ pe merā īmān hai
gar ḳhudā ruuTh jaa.e to sajde karūñ aur sanam ruuTh jaa.e to maiñ kyā karūñ

guzar kar ḳhāna-e-dil se baḌhūñ kyuuñ tuur kī jānib
ki barq-e-husn se jalne ko hai maujūd ghar merā

use parde meñ rah kar bhī ḳhayāl aatā hai rah rah kar
ki raaz ifshā na kar de ḳhalq meñ husn-e-bashar merā

naqāb-e-husn jab uTThā to āñkheñ khul ga.iiñ merī
faroġh-e-husn thā dam-bhar ko mānind-e-sharar merā

cham cham karte husn kī tum jo ashrafiyāñ laa.e ho
is mīzān meñ ye duniyāvī daam nahīñ chal saktā

jo sho.abde the tere pīr-e-vaqt un kā kyā huā
atā-e-husn-o-ishq par davām kyuuñ nahīñ rahā

dil ye kahtā hai ki husn us kā jahāñ-tāb bhī ho
aur phir ye bhī hai ki ham hī use tanhā dekheñ

kis ko hai husn-e-ḳhudā-dād kā da.avā dekheñ
kis kā chehra nahīñ minnat-kash-e-ġhāza dekheñ

misr kā chāñd bhī shaidā hai azal se un kā
husn kā husn bhī dīvāna nazar aatā hai

hai ajab husn-e-tasavvur tire dīvāne kā
tere jaisā tirā dīvāna nazar aatā hai

kabhī hotā huuñ zāhir jalva-e-husn-e-niko ho kar
kabhī ḳhātir meñ chhup jaatā huuñ terī aarzū ho kar