Tags-Husn

tū hai dariyā-e-husn-o-mahbūbī
shakl-e-mauj-o-habāb haiñ ham log

husn-kārī ke liye aaj ye dildār-e-suḳhan
rañg-e-ḳhūñ aur zarā bū-e-hinā māñge hai

kis shaan se chalā hai mirā shahsavār-e-husn
fitne pukārte haiñ zarā haT ke raah se

shaiḳh-sahab kā īmān bik hī gayā dekh kar husn-e-saqī pighal hī gayā
aaj se pahle ye kitne maġhrūr the luT ga.ī pārsā.ī mazā aa gayā

bulbul-e-shīrāz kuuñ kartā huuñ yaad
husn kuuñ tere gulistāñ buujh kar

jaam meñ ghol kar husn kī mastiyāñ chāñdnī muskurā.ī mazā aa gayā
chāñd ke saa.e meñ ai mire sāqiyā tū ne aisī pilā.ī mazā aa gayā

ġhurūr-e-husn bhī mere liye juzv-e-adā dā.ere
mirā ehsās bhī tere liye pindār ho jaa.e

ye nazar kī tishnagī ye salsabīl-e-husn-e-yār
jī sulagtā hai laboñ ke paas dariyā dekh kar

jo khile hue haiñ ravish ravish vo hazār husn-e-chaman sahī
magar un guloñ kā javāb kyā jo qadam qadam pe kuchal ga.e

vaqt kī baat hai alag jānāñ
husn sauġhāt hai alag jānāñ

go husn kī sūrat haiñ mirī samt ravāñ bhī
ik ḳhvāb sī lagtī haiñ mujhe raushaniyāñ bhī

mehr o muravvat se tumheñ vāstā
ye bhī harīfoñ kā hai ik husn-e-zan

faiz-e-mohabbat se hai qaid-e-mihan
mere liye ek balā-e-hasan

tarbiyat ko husn-e-sohbat chāhiye
baiThiye ustād-e-kāmil ke qarīb

har chand nāz-e-husn pe ġhālib na aa sake
kuchh aur mārke haiñ jo sar kar rahe haiñ ham

ik barq thī zamīr meñ fitrat ke maujzan
aaj us ko husn o ishq kā sāmāñ banā diyā

us husn-e-kārobār ko mastoñ se pūchhiye
jis ko fareb-e-hosh ne isyāñ banā diyā

tirā ishq hai mirī zindagī tire husn pe maiñ nisār huuñ
tirā rañg aañkh meñ bas gayā tirā nuur dil meñ utar gayā

tire diid se ai sanam chaman ārzuoñ kā mahak uThā
tire husn kī jo havā chalī to junūñ kā rañg nikhar gayā

be-mausam bārish kī sūrat der talak aur duur talak
tere dayār-e-husn pe maiñ bhī kin-min kin-min barsūñgā