Tags-Husn

us husn ke dariyā ne jo phir kar mujhe dekhā
mauj-e-qadam-e-nāz ko girdāb banāyā

husn ke bhed kā pā lenā nahīñ hai āsāñ
hai ye vo raaz ki rāzoñ meñ palā ho jaise

jadīd lahja ye andāz kis liye 'bekal'
tujhe to husn-e-rivāyat se inhirāf na thā

abhī hai husn meñ husn-e-nazar kī kār-farmā.ī
abhī se kyā batā.eñ ham ki vo kaisā nikaltā hai

hamāre haath se aatī hai bū-e-pairāhan
hamāre husn-e-talab kī adā bhī ḳhuub rahī

ishq ai husn be-basar hī sahī
ye haqīqat-nigar bhī hotā hai

daaġh husn-e-qamar bhī hotā hai
aib rashk-e-hunar bhī hotā hai

husn hotā hai kuchh to husn-e-nazar
kuchh fareb-e-nazar bhī hotā hai

nashsha-e-husn meñ sarshār chalā jaatā hai
shab-e-tārīk hai dildār ḳhudā ko sauñpā

fareb-e-husn-e-samā.at tirī duhā.ī hai
haqīqatoñ kī jagah chhīnte haiñ afsāne

ye jo kahnā hai ki har husn jafā-pesha hai
ek tohmat hai mire rashk-e-adn kī had tak

ab husn meñ paidā haiñ pazīrā.ī ke āsār
tum ishq meñ kuchh jur.at-e-iz.hār to laao

saarī duniyā ko Thukrāyā jā saktā hai
husn-o-ishq duā se paayā jā saktā hai

ye be-niyāzī kī ḳhū mire husn meñ bahut thī
magar use be-qarār maiñ ne nahīñ kiyā thā

kuchh ehtirām-o-husn-e-aqīdat ke josh meñ
har naqsh āb-e-naqsh-e-hajar kah diyā gayā

vo alag maiñ alag vo kahīñ haiñ kahīñ vāqa.ī ye to shāyān-e-ulfat nahīñ
vo adā-āshnā husn-e-nāz-āfrīñ be-niyāzī dikhā.e to maiñ kyā karūñ

dil se dil ko raah kaisī hai ye husn-e-ittifāq
varna duniyā meñ mohabbat kā asar kuchh bhī nahīñ

ishq kī be-tābiyāñ haiñ husn kī ra.anā.iyāñ
ho ga.e haiñ ziist ke sāmāñ baham mere liye

har sitam mere liye hai har karam mere liye
husn ke jalve haiñ saare besh-o-kam mere liye

ai kaash mire gosh o nazar bhī raheñ sābit
jab husn sunā jaa.e yā naġhma nazar aa.e