Tags-Husn

haañ jalā de ḳhaak kar de phūñk de hastī mirī
tū to sham-e-husn hai maiñ to tirā parvāna huuñ

maiñ huuñ un kī ibtidā aur vo haiñ merī intihā
ḳhatm ho jo husn par vo ishq kā afsāna huuñ

vo bhī to haiñ nazāra-e-kul juz meñ hai jinheñ
poshīda rāz-e-dīd to husn-e-nazar meñ hai

dekhā hai aur phir nahīñ aayā nazar tujhe
vo husn vo jalāl jo shams o qamar meñ hai

husn-e-azal kā jalva hamārī nazar meñ hai
jo tuur par huā thā dil-e-dīda-var meñ hai

husn to ho chalā zamāna-shanās
ishq kā bhī koī bharosa nahīñ

husn vaale to bahut phirte haiñ har sū lekin
tum sā koī nahīñ guzrā hai nazar se pahle

duniyā use pūjegī ba-sad husn-e-aqīdat
maiñ apnī shabāhat ko jo patthar se nikālūñ

jo dī thī husn meñ ye dil-farebī
mujhe hosh-o-havās itne diye kyuuñ

husn se arz-e-shauq na karnā husn ko zak pahuñchānā hai
ham ne arz-e-shauq na kar ke husn ko zak pahuñchā.ī hai

husn ke jaane kitne chehre husn ke jaane kitne naam
ishq kā pesha husn-parastī ishq baḌā harjā.ī hai

jo kahiye husn ko ḳhvāhish nahīñ ye kyā imkāñ
use bhī ahl-e-nazar se hai ik nazar kī talab

husn-e-talab-e-barq hai ta.amīr-e-nasheman
varna havas-e-sair-e-gulistāñ to nahīñ hai

naqāb-e-ruḳh uThā kar husn jab jalva-figan hogā
na pūchho kyā qayāmat-ḳhez rañg-e-anjuman hogā

chehre kā nisf hissa zer-e-naqāb kar ke
karte haiñ husn vaale dīdār meñ milāvaT

ham nikhāreñge terā husn-o-jamāl
ham sanvāreñge terī zulf ke ḳham

ishq kā sheva husn kī fitrat
ek haqīqat ek fasāna

shola-e-husn chaman meñ na dikhāyā us ne
varna bulbul ko bhī parvāna banāyā hotā

ye barq-e-husn aur us par ye terī ḳhū-e-hijāb
ye sail-e-ishq aur is par nazar nazar kā shumār

vo ḳhūbāñ jahāñ ashkoñ se jin kā husn sīñchā thā
vahī ba.ad-e-fanā miTTī mirī barbād karte haiñ