Tags-Husn

badle haiñ husn-o-ishq to aqdār bhī na.ī
le kar na.e javāz sitamgar bhī ā.eñge

husn-e-lab-o-gesū ko diyā ham ne nayā naam
aalam se judā rakhte haiñ andāz-e-nazar ham

ma.alūm ham ne kar liye asrār-e-husn-o-ishq
taqdīr se agar koī dīvāna mil gayā

ishq mahv-e-ġham-e-zindagī ho gayā husn madhosh-e-ishva-tarāzī rahā
ahl-e-dil hosh meñ aa chuke haiñ magar hai vahī ālam-e-dil-barāñ aaj tak

dil ke muāmlāt meñ nāseh shikast kyā
sau baar husn par bhī ye ilzām aa gayā

dil ko na pūchh mārka-e-husn-o-ishq meñ
kyā jāniye ġharīb kahāñ kaam aa gayā

kiyā hai qatl jo 'uzlat' ko ab na ro ai yaar
ki sar pe husn-parastoñ ke jo huā so huā

chashm-e-yaqīñ se dekhiye jalva-gah-e-sifāt meñ
husn hī husn hai tamām ishq kī kā.enāt meñ

aa.ina ho jaa.e merā ishq un ke husn kā
kyā maza ho dard agar ḳhud hī davā dene lage

aañkh vā hai aur husn-e-yār hai pesh-e-nazar
shash-jihat ke bāqī-māñda sab nazāro taḳhliya

apne faroġh-e-husn kī dikhlā ke vus.ateñ
mere hudūd-e-shauq baḌhā kar chale ga.e

husn-e-azal kī shaan dikhā kar chale ga.e
ik vāqi.a sā yaad dilā kar chale ga.e

hai husn kī garmī setī betāb shab-o-roz
ai bād-e-sahar zulf-e-pareshāñ kuuñ pahuñch tuuñ

vo nahā kar zulf-e-pechāñ ko jo bikhrāne lage
husn ke dariyā meñ pinhāñ saañp lahrāne lage

ā.īna-sifat vaqt tirā husn haiñ ham log
kal aa.ine tarseñge to sūrat na milegī

ishq meñ pyaar ke imkān badal jaate haiñ
husn ke faiz se rūmān badal jaate haiñ

mashrab-e-husn ke unvān badal jaate haiñ
maz.hab-e-ishq meñ īmān badal jaate haiñ

ai 'shauq' har tarah ke nazar aa rahe haiñ husn
naḳhḳhās hī meñ kūcha-e-jānāñ hai ġhāliban

parvāna-e-husn kā shaidā.ī paapī bhañvrā ras kā lobhī
chāhat ko saudā.ī samjhe us ko harjā.ī kyā jaane

kyūñkar baġhair jalva-e-hairat tarāz-e-husn
paa.eñ najāt dil kī pareshāniyoñ se ham