Tags-Husn

ishq kyā shai hai husn hai kyā chiiz
kuchh idhar kī hai kuchh udhar kī aag

tire husn tere jamāl kā maiñ divāna yuuñ hī nahīñ huā
hai mujhe ḳhabar tire ruup meñ ye chhupā huā koī aur hai

sunā hai shā.ir-e-ḳhush-fikr ho gayā 'mānī'
niyāz-mand hai ik husn-e-ḳhush-nigāh kā dil

kabhī is raushnī kī qaid se bāhar bhī niklo tum
hujūm-e-husn ne saara sarāpā gher rakkhā hai

'shakīl' husn-e-talab kā mo.āmla hai vahāñ
vo kāmyāb hai jo be-talab dikhā.ī de

husn aur ishq haiñ donoñ kāfir
donoñ meñ ik jhagḌā sā hai

ab to tere husn kī har anjuman meñ dhuum hai
jis ne merā haal dekhā terā dīvāna huā

kahte haiñ husn hī kī amānat hai dard-e-ishq
ab kyā kisī ke ishq kā daavā kare koī

itne hijāboñ par to ye aalam hai husn kā
kyā haal ho jo dekh leñ parda uThā ke ham

husn bhī kambaḳht kab ḳhālī hai soz-e-ishq se
sham.a bhī to rāt-bhar jaltī hai parvānoñ ke saath

mire ḳhudā mujhe ab husn kī bashārat de
maiñ us ke shahr pe ilhām honā chāhtā huuñ

husn-e-shīrīñ rahā shikār-e-havas
jehd-e-farhād be-husūl huī

har haqīqat hai ek husn 'hafīz'
aur har husn ik haqīqat hai

jo nasha jvānī kā utregā to khīñcheñge ḳhumār
ab to ḳhūbāñ sab sharāb-e-husn ke sarshār haiñ

jaane kyā kyā kah gayā us se mirā husn-e-sukūt
der tak vo mere chup rahne pe sharminda rahā

haqīqat miT nahīñ saktī badal dene se tārīḳheñ
har ik fan meñ hamārā husn-e-ālam-gīr bole hai

ḳhushā vo daur-e-mohabbat ki vaqf ho jaa.e
jabīn-e-husn mohabbat ke sañg-e-dar ke liye

fareb-e-husn hai duniyā mirī nazar ke liye
nigāh-e-ishq nahīñ husn-e-rahguzar ke liye

vo ba-zo.am-e-husn haiñ ḳhud-nigar to mujhe bhī naaz hai ishq par
maiñ niyāz-mand sahī magar mujhe 'soz' pās-e-anā bhī hai

īmān kī daulat se tire husn kā saudā
īmān kī daulat hai tirī ek nazar kī