Tags-Husn

magar mahrūm zāhid ho gayā hai gosh-e-shanvā se
use but-ḳhāne meñ husn-e-butāñ kuchh aur kahtā hai

vo mere saañs kī dhanak meñ jhūltā thā kaun
kis kā thā rañg-rūp jo husn-e-ḳhalā meñ thā

junūñ kā paas vafā kā ḳhayāl husn kā ġham
ka.ī charāġh jale ek aarzū ke liye

husn-e-ḳhud-bīñ jis kī fitrat sheḳhī shoḳhī zulm-o-jaur
dām-e-ulfat meñ phañs jaa.e merī āñkhoñ dekhī baat

ruḳh kā jalva pinhāñ rakkhā paidā kar ke maḳhlūqāt
husn-e-zāhir sab ne dekhā kis ne dekhā husn-e-zāt

dam-e-nazzāra laḌe marte haiñ āshiq us par
daulat-e-husn ke pesh aane se duniyā hai vo ruḳh

nuur jo us meñ hai ḳhurshīd meñ vo nuur kahāñ
ye agar husn kā chashma hai to dariyā hai vo ruḳh

tā-kujā sharh karūñ husn ke us ke 'ātish'
mahr hai maah hai jo kuchh hai tamāshā hai vo ruḳh

tujhe kaun jāntā thā mirī dostī se pahle
tirā husn kuchh nahīñ thā mirī shā.irī se pahle

husn kahtā thā chheḌne vaale
chheḌnā hī to bas nahīñ chhū bhī

husn-e-maġhmūm tamkanat meñ tirī
farq aayā na yak-sar-e-mū bhī

mausīqī-e-husn kī maujeñ thī kuchh āñkhoñ meñ kuchh pyāloñ meñ
jo sāhil-e-dil tak ho aa.eñ yādoñ ke ek safīne meñ

jab dard kī sham.eñ jaltī haiñ ehsās ke nāzuk siine meñ
ik husn sā shāmil hotā hai phir tanhā tanhā jiine meñ

ham bhī sunte jo tire husn ke charche hote
kaash us vaqt tirī bazm meñ baiThe hote

kise ḳhabar thī ki ban ke barq-e-ġhazab giregā yahī chaman par
vo husn jo muskurā rahā thā naqāb-e-abr-e-ravāñ se pahle

kyā kuchh luTā diyā hai tirī har adā ke saath
kyā mil gayā hameñ jo ye husn-e-bayāñ milā

butoñ ko dekh kar aatā hai tū yaad
butoñ ke husn meñ jalva tirā hai

tumhīñ kaho jo luTā deñ to kaun ḳhālī ho
ḳhazāna husn kā afzūñ hai yā ḳhazāna-e-ishq

kisī ke husn ne kāfir banā diyā 'mā.il'
lagā ke qashqa-e-durd-e-sharāb-ḳhāna-e-ishq

vo dar tak aate nahīñ dar se ham nahīñ uThte
udhar bahāna-e-husn aur idhar bahāna-e-ishq