Tags-Imprisonment

hathelī kī lakīroñ meñ
muqaddar qaid hai

badan kī qaid se chhūTā to log pahchāne
tamām-umr kisī ko mirā patā na milā

ye kā.enāt bhī kyā qaid-ḳhāna hai koī
ye zindagī bhī koī tarz-e-intiqām hai kyā

janam janam tak qaid rahā ik be-ma.anī añgḌā.ī meñ
maiñ huuñ vo mehrāb jise mere hī patthar bhuul ga.e

tasvīr meñ jo qaid thā vo shaḳhs raat ko
ḳhud hī frame toḌ ke pahlū meñ aa gayā

na jaane qaid meñ huuñ yā hifāzat meñ kisī kī
khiñchī hai har taraf ik chaar dīvārī sī koī

ḳhuub e.azāz giraftār-e-mohabbat kā huā
un ko hai madd-e-nazar qaid-e-davām-e-maḳhsūs

qaid se vahshī chhūT ga.e
dekheñ kyā gul khiltā hai

ab to ik muddat se haiñ dīvār-o-dar kī qaid meñ
saath rahte the kabhī sahrā samundar aur ham

zikr-e-gulshan chalā to ham samjhe
qaid-ḳhāne kī baat karte ho

rihā.ī dī mujhe qaid-e-alā.iq se ināyat kī
kisī kī teġh kā mamnūn hai merā gulū kyā kyā

qaid-e-āvārgī-e-jāñ hī bahut hai mujh ko
ek dīvār mirī ruuh ke andar na banā

ye dil kuchh aaphī ho jaatā hai band aur aaphī khultā hai
na maiñ qaid is ko kartā huuñ na maiñ āzād kartā huuñ

ye safar ma.alūm kā ma.alūm tak hai ai 'munīr'
maiñ kahāñ tak in hadoñ ke qaid-ḳhānoñ meñ rahūñ

qaid rakhtā hai jo tūfān ko apne andar
aise qatre ko samundar kī zarūrat kyā hai

āvāz ke hisār meñ dil ab bhī qaid hai
māñge hai ab bhī pairahan-e-lafz har umañg

mahsūs kar rahā huuñ ḳhāroñ meñ qaid ḳhushbū
āñkhoñ ko terī jānib ik baar kar liyā hai

chāñd meñ kaise huī qaid kisī ghar kī ḳhushī
ye kahānī kisī masjid kī azaañ se suniye

hameñ piine se matlab hai jagah kī qaid kyā 'beḳhud'
usī kā naam jannat rakh diyā botal jahāñ rakh dī

mahak uTThe ye bayābāñ bhī gulistāñ kī tarah
qaid-e-gulzār se āzād jo ḳhushbū nikle