Tags-Imprisonment

gharoñ meñ qaid ho kar rah ga.ī hai zindagī sab kī
zamāne kī fazā meñ dost kaisā ye asar aayā

pas-e-gardūñ kisī ne naam bolā thā hamārā
badan kī qaid se haa.e rihā honā hamārā

said ko rashk-e-chaman daam ne rahne na diyā
naġhma-ḳhvāñ qiad-e-bad-anjām ne rahne na diyā

bahār aate hī baTtī haiñ ye chīzeñ qaid-ḳhānoñ meñ
salāsil haath ko paañv ko beḌī tauq gardan ko

kab tak vo malhār kī tāneñ qaid meñ rakkheñ dekhūñ to
ab to dīpak raag alāpūñ aur ḳhud ko jal jaane duuñ

hameñ na raas aayā dil lagānā ġhazab huā phir gayā zamāna
koī to kahtā hai qaid kar do koī ye kahtā hai kushtanī hai

ye aur baat maiñ apnī anā meñ qaid rahā
vagarna us kā pighalnā to kuchh muhāl na thā

qaid-e-makāñ se dekhiye kab tak rihā.ī ho
ab tak to bad-gumāñ dar-o-dīvār bhī nahīñ

āftāb us raaz se nā-āshnā shāyad nahīñ
qaid-e-mehvar se kisī din ye rihā ho jā.egā

but-ḳhāne se dil apne uThā.e na ga.e
ka.abe kī taraf mizāj laa.e na ga.e

bas ek had hai ki aage nikal nahīñ paate
qadam qadam pe vafā.eñ bhī qaid kartī haiñ

jabhī to khul ke barastī haiñ abr kī sūrat
ki mere ashk ghaTā.eñ bhī qaid kartī haiñ

mirī sadā ko havā.eñ bhī qaid kartī haiñ
mirī nigah ko fazā.eñ bhī qaid kartī haiñ

maiñ terī yaad kī chādar ko oḌh letī huuñ
diloñ ke dard ridā.eñ bhī qaid kartī haiñ

ye ik hisār banātī haiñ chaar sū mere
mujhe to terī duā.eñ bhī qaid kartī haiñ

ham bhī usī ke saath ga.e hosh se 'sa.īd'
lamha jo qaid-e-vaqt se bāhar chalā gayā

qaid shīshe meñ rahūñ aks banūñ shaad rahūñ
yā ki phir phoḌ ke ye aa.ina āzād rahūñ

qaid-e-tanhā.ī se qaid-e-umr meñ aa jā.ūñgā
farq itnā hai ki khānā apne ghar kā khā.ūñgā

nahīñ ma.alūm yūñhī ḳhud ko kahāñ tak 'manshā'
qaid-e-aḳhlāq se āzād karegī duniyā

qafas meñ qaid ik panchhī ke jaise
mirā kirdār Dhaltā jā rahā hai