Tags-Imprisonment

to umr biit chukī thī chaman mahakne kī
jab us ne qaid se 'rāhat' mujhe rihā.ī dī

mujh se milnā hai to ye qaid nahīñ mujh ko pasand
har mulāqāt muqayyad rahe itvār ke saath

qaid naġhme kī huī qaid-e-qafas par turra
ham se sayyād ko naale bhī sunā.e na ga.e

mujh sā bulbul qaid ho kar chhūT jaa.e
so ga.e kyā baḳht-e-bedār-e-qafas

zindagī se qaid meñ bhī huuñ subuk
gaah bār-e-dām gah bār-e-qafas

kyuuñ na maiñ rañgīñ-bayāñ huuñ qaid-e-rañj
murġh-e-ḳhush-ḳhvāñ hai sazāvār-e-qafas

'ājiz' chhuḌā.e baḳht agar qaid-e-zīst se
aa.uuñ kabhī na ālam-e-ījād kī taraf

bichhaḌne vaale bichhaḌte Time na kah sake kuchh na sun sake kuchh
bas ek photo meñ qaid kar lī ga.ī balā kī hasīñ udāsī

chhūTe jo qafas se to vahī qaid-e-chaman thī
āzād yahāñ tak the giraftār yahāñ tak

na jaane kaisī mohabbat meñ qaid ho ga.ī huuñ
maiñ roz dekhtī huuñ dā.era hathelī kā

ishq-e-āvāra kahāñ qaid-e-dar-o-bām kahāñ
be-navāoñ ke liye sāya-e-dīvār bahut

giraftār hai jo tirī zulf kā
vo har qaid se fāriġh-ul-bāl hai

un asīroñ ko hui qaid-e-ta.ayyun se najāt
jo ki pāband tire gesu-e-pechāñ meñ rahe

but-e-kāfir kī parastish pe koī qaid nahīñ
pūjne vaale musalmān bhī ho sakte haiñ

mulk bhar ko qaid kar de kis ke bas kī baat hai
ḳhair se sab haiñ koī do-chār das kī baat hai

laakh be-yār-o-madadgār phire sāhil par
qaid rahtī hai sadaf meñ hī guhar kī tārīḳh

duniyā-e-be-sabāt kā qissa thā muḳhtasar
tuul itnā merī qaid kī mī.ād se huā

mah o sitāra se dil kī taraf chalā vo javāñ
adū kī qaid se apnī sipāh meñ aayā

kahīñ ye manzar meñ qaid lamhe kahīñ ye lamhoñ meñ qaid manzar
rasā.ī kī āzmā.ishoñ meñ rihā.ī kā imtihān sā kuchh

dil ko dukhātī hai phir bhī kyuuñ achchhī lagtī hai
yādoñ kī ye shaam suhānī dil meñ qaid huī