Tags-Imprisonment

is qadar hai ai parī-rū zor par josh-e-junūñ
sar se toḌūñ qaid agar lohe kī dīvāroñ meñ huuñ

dostī aur dushmanī ke naam se
qaid huuñ kis kis ke andar ai ḳhudā

aish-e-āzādī kabhī miltā to hotā ranj-e-qaid
mustaqil jam.iyat-e-dil hai pareshānī kahāñ

jurm merā sirf itnā thā ki maiñ mujrim na thā
qaid tak mujh ko subūt-e-be-gunāhī le ga.e

shorīdgi-e-sar ke liye sañg-e-dar kī qaid
zanjīr-e-ġham ke vāste zulf-e-dotā kī shart

bachche khulī fazā meñ kahāñ tak nikal ga.e
ham log ab bhī qaid isī bām-o-dar meñ haiñ

qaid kar le jā.egā nīndoñ kī saarī kā.enāt
haañ magar palkoñ pe kuchh sachche guhar rakh jā.egā

ye tasavvur-e-rihā.ī rahe kyuuñ nazar meñ 'gauhar'
mujhe qaid karne vaale mire bāl-o-par jalā de

qafas meñ qaid rakh yā qaid se āzād rahne de
bahar-sūrat chaman hī meñ mujhe sayyād rahne de

ai bachcho ai hañsne vaalo tārīḳh-e-mohabbat paḌh Daalo
dil vaale ke dil par qaid nahīñ har umr meñ Thokar khātā hai

saañs kī tarkīb par miTTī ko pyaar aa hī gayā
ḳhud huī qaid us ko siine se lagāne ke liye

qaid-e-guftār bhī hai bandish-e-raftār bhī hai
aise māhaul ko zindān-e-balā kahte haiñ

āzād karte tum hameñ qaid-e-hayāt se
is ke evaz jo dil ko giraftār kar chale

beḌiyāñ toḌ kar samājoñ kī
ishq meñ qaid haiñ divāne do

ḳhushbū kī aarzū meñ sazā qaid kī huī
sahrā uThā ke laa.e to pūchhā nahīñ gayā

na thī ḳhudā kī zamīñ tañg jin ke qadmoñ par
fuġhāñ ki qaid vo dīvār-o-dar meñ rahte haiñ

kab talak qaid rakhūñ aañkh meñ bīnā.ī ko
sirf ḳhvāboñ se guzārā to nahīñ ho saktā

bandish rañj-o-alam fikr-e-ajal qaid-e-hayāt
dars-e-ulfat lījiye sab se rihā ho jā.iye

kahā falak ne ye uḌte hue parindoñ se
zamīñ pe log makānoñ meñ qaid rahte haiñ

har haal meñ merā dil-e-be-qaid hai ḳhurram
kyā chhīnegā ġhunche se koī zauq-e-shakar-ḳhand