Tags-Imprisonment

phañse na qaid-e-ta.alluq meñ jo ki hai āzād
chaman meñ tā.ir-e-nik.hat asīr-e-dām nahīñ

rahe qaid-o-band kī lazzateñ ki aziyyateñ bhī haiñ rāhateñ
maiñ qafas meñ aate hī sarhad-e-ġham-e-āshiyāñ se guzar gayā

ai tire dām-e-mohabbat ke dil o jaañ sadqe
shukr hai qaid-e-alā.iq se ham āzād rahe

chaT chuke qaid-e-qafas se ab asīrān-e-chaman
ba.ad vīrāne ke ābād āshiyāna ho chukā

jismoñ kī qaid toḌ ke nikle to shahr meñ
hone lagā hai ham pe gumāñ devtāoñ kā

bahut se tiir haiñ terī kamāñ meñ qaid ab bhī
mire lahū se qabā apnī laal kartā jā

nairañg-e-qaid-e-hastī-e-fānī na pūchhiye
martā huuñ roz aur kabhī martā nahīñ huuñ maiñ

ye mohabbat ḳhushnumā piñjra koī
qaid kī aadī na ho jaanā 'hinā'

is se behtar thā ki tū qaid hī rakhtā mujh ko
par katar kar mirā kyuuñ baaġh meñ āzād kiyā

ai bād-e-chaman tujh ko na aanā thā qafas meñ
tū ne to mirī qaid kī mī.ād baḌhā dī

qaid-e-tan se ruuh hai nāshād kyā
chand-roza umr kī mī.ād kyā

maiñ jazb o bast kī manzil meñ qaid huuñ kab se
mire ḳhudā tū farārī kā rāsta kar de

ham makānoñ kī qaid ke panchhī
lā-makānī kā kyā kareñ sāhab

roz sapnoñ ko qaid kartā huuñ
jaane āzād kaun kartā hai

ek arse se qaid ho ghar meñ
aaj bāhar chalo to achchhā hai

māyūsiyoñ kī qaid se ḳhud ko nikāl kar
aa jaao mere paas ki zinda huuñ maiñ abhī

milī sar phoḌte hī qaid-e-hastī se bhī āzādī
rukāvaT Daal kar zindāñ kī dīvāroñ ne kyā paayā

makāñ meñ qaid-e-sadā kī dahshat
makāñ se bāhar ḳhalā kī dahshat

qaid kare to aap hai qaid sahe to aap hai
maiñ kise roktā phirūñ aur kise rihā karūñ

tai apnī qaid kī mī.ād karte jā.eñge
udaas rut meñ tujhe yaad karte jā.eñge