Tags-Imprisonment

jab ho isbāt hī ḳhud apnī nafī kā baa.is
dil ko har qaid-e-tamannā se chhuḌānā hogā

jumbish-e-lab kī ijāzat hai na izn-e-parvāz
kis liye tū ne mujhe qaid se āzād kiyā

asīr-e-zulf kyūñkar chhuT sakeñge qaid-e-vahshat se
ki hai har jāda-e-dasht-e-junūñ zanjīr patthar kī

sāhil kī qaid meñ kahīñ jaltī hai ik nadī
mere ḳhayāl ret ke dariyā meñ mar ga.e

ho qaid tum apnī zaat ke ḳhol meñ agarche
bas ek ḳhushbū huuñ dastakoñ meñ tumheñ milūñgī

qaid-e-mausam nahīñ naġhmāt-e-anā dil ke liye
koī mausam ho gul-e-tar kī zabāñ ho jaanā

qaid-e-hayāt par dil dīvāna-vār nāche
masrūr hai ki aayā terī supurdagī meñ

jis pe likkhā thā mirā nām-o-nasab
qaid maiñ miTTī ke us bartan meñ thā

vo rāh-rau huuñ ki manzil nahīñ qayām nahīñ
talāsh-e-dost meñ kuchh qaid-e-sub.h-o-shām nahīñ

sadiyoñ ke band TuuTe āzād hoga.e ham
qaid-e-girāñ se chhūTe dil-e-shād ho ga.e ham

ġham-e-zindagī kā ilaaj to kabhī maut se bhī na ho sakā
ye vo saḳht qaid-e-hayāt hai kisī tarah jis se mafar nahīñ

jalva mahsūs sahī aañkh ko āzād to kar
qaid-e-ādāb-e-tamāshā bhī to mahfil se uThā

vo chhūTtā hai qaid se hastī kī jo koī
ho bū-e-gul kī tarah se uryāñ nikal gayā

na ho jab rañg-e-āzādī chaman meñ
to phir andesha-e-qaid-e-qafas kyā

bandagī ko qaid se āzād hote dekhiye
par-shikasta said ko sayyād hote dekhiye

nafas hai saḳhtī-e-qaid-e-hayāt kā zāmin
nikal sake jo na phāñsī se vo gulū huuñ maiñ

hai na.ī qaid ab ye āzādī
zor TuuTā huā hai baazū kā

vo rātoñ-rāt 'sirī-krishn' ko uThā.e hue
balā kī qaid se 'basdev' kā nikal jaanā

ye kyā ki zo.am-e-qazāvat meñ qaid kar liyā hai
koī to aib nikāleñ janāb doshī meñ

asīr-e-zulf jo marte haiñ to vo kahte haiñ
zarā bhī sadma-e-qaid-e-girāñ uThā na sake