Tags-Imprisonment

apne badan kī qaid se lekin chhuTkārā nā-mumkin hai
bāhar kī saarī dīvāreñ toḌ chukā huuñ vaise to

daam aur qafas Thahre qissa-hā-e-pārīna
qaid kar diyā us ne mujh ko āb-o-dāne meñ

dil-e-āvāra kyā pābañd-e-zanjīr-e-ta.alluq ho
na thā bas meñ kisī ke bhī havā ko qaid kar jaanā

dushvār bahut ye manzil thī mar miT ke tah-e-turbat pahuñche
har qaid se ham āzād hue duniyā se alag ab rahnā hai

āzād ho chukā huuñ maiñ qaid-e-havās se
bām-e-nazar se ab mirā baalā maqām kar

shart-e-dīvār-o-dar-o-bām uThā dī hai to kyā
qaid phir qaid hai zanjīr baḌhā dī hai to kyā

zulm par bāñdhī hai phir sayyād-o-gulchīñ ne kamar
qaid-e-bulbul kī hai gulshan meñ pukār ab ke baras

hameñ dair-o-haram meñ qaid rakkhā bad-nasībī ne
jahāñ sajde kī gunjā.ish na thī sajda vahāñ karte

maiñ hī apnī qaid meñ thā aur maiñ hī ek din
kar ke apne aap ko āzād le jaane lagā

is tishnagī kī qaid se jaise bhī ho nikāl
piine ko kuchh bhī chāhiye paanī hī kyuuñ na ho

merī fikr kī ḳhushbū qaid ho nahīñ saktī
yuuñ to mere hoñToñ par maslahat kā taalā hai

qaid-ḳhānoñ ke añdheroñ meñ baḌe chain se haiñ
apne andar ke ujāloñ se guzarte hue log

mujh meñ vo kaun sī shai hai jo har ik pal mujh se
honā kab qaid-e-badan se hai rihā pūchhtī hai

shahr saarā ḳhauf ke gūñge qile meñ qaid thā
ik ḳhudā-e-vaqt kī hākim sadā kā shor thā

gharoñ meñ qaid dar-o-bām kī har ik uljhan
galī galī ke laboñ se lipaT rahī hogī

DhūñDhtā hai koī rastā mire ā.īne meñ
qaid jo shaḳhs hai mujh sā mire ā.īne meñ

qafas meñ qaid karnā thā to bāl-o-par katarne the
sitam hai bāl-o-par rakhte hue bhī yuuñ basar karnā

qaid ho kar maiñ ne kholī ham-safīroñ kī zabāñ
kis gulistāñ meñ mirā zikr-e-giraftārī nahīñ

ye ḳhvāb-o-ḳhur farzand-o-zan aur māl-o-zar zindāñ huā
to chhūT kar is qaid suuñ hāsil kare dīdār kab

rakkhe kahīñ ye shauq-e-rihā.ī mujhe na qaid
taḌpā agar yahīñ to raheñge zarūr par