Tags-Imprisonment

akasr badan kī qaid se āzād ho ke bhī
apnā hī aks duur se maiñ dekhne gayā

jaane kis ehsās ne aage nahīñ baḌhne diyā thā
ab paḌā huuñ qaid maiñ raste ke patthar meñ akelā

ab jo āzād hue haiñ to ḳhayāl aayā hai
ki hameñ qaid bhalī thī to sazā kaisī thī

mahall-e-sajda jahāñ hogā sar jhukegā vahīñ
asīr-e-qaid-e-ta.ayyun na bandagī hogī

jism kī qaid se sab rañg tumhāre nikal aa.e
merī dastak se to tum aur bhī pyāre nikal aa.e

mehrbānī mire sayyād kī dekhe koī
jab ḳhizāñ aa.ī mujhe qaid se āzād kiyā

qaid-e-sujūd-e-dair-o-haram phir hai kyā zarūr
vo lā-makāñ hai us kā koī sañg-e-dar nahīñ

ranj-o-malāl-o-ġham se kisī ko mafar nahīñ
āzād qaid-e-fikr se koī bashar nahīñ

ham abhī nidāmat kī qaid se nahīñ nikle
kāTte haiñ roz o shab fasl be-qarārī kī

badan kī qaid se bāhar Thikānā chāhtā hai
ajiib dil hai kahīñ aur jaanā chāhtā hai

kahīñ shabnam kahīñ ḳhushbū kahīñ taaza kalī rakhnā
purānī Diary meñ qaid kar ke zindagī rakhnā

sab qaid huā jaatā hai tañgnā.e-ġhazal meñ
manzar pas-e-manzar hai badalne kī tarah kā

chhoḌī hai un kī chaah to ab lag rahā hai yuuñ
jaise maiñ itne roz añdheroñ meñ qaid thā

gar ye bhī ho sake na to kahtā hai 'mus.hafī'
do chaar kar le qaid meñ do-chār maar Daal

nigāh-e-shīsha-e-hasrat meñ qaid ho jaate
ye aur baat ki ham vaqt par nikal aa.e

ho ke ḳhushbū-e-gul-e-rāz uḌegā ik din
kab talak qaid rahegā pas-e-dīvār-e-ḳhayāl

ik qafas meñ ḳhayāl-o-bū kī tarah
qaid bhī maiñ rahūñ rihā bhī rahūñ

naqsh-bar-āb sahī kuchh bhī sahī huuñ to sahī
ret kī qaid meñ kyā ḳhud se bichhaḌ kar aa.uuñ

ye dil kuchh aaphī ho jaatā hai band aur aaphī khultā hai
na maiñ qaid is ko kartā huuñ na maiñ āzād kartā huuñ

na chhoḌā dāman-e-hosh-o-ḳhirad dil ne mohabbat meñ
sazā-e-dil hisār-e-āgahī kī qaid-e-tanhā.ī