Tags-Imprisonment

qaid-e-sayyād meñ bulbul kā chahaknā na gayā
ab bhī samjhī na sabab apnī giraftārī kā

qaid-e-ulfat kā maza zulf-e-girah-gīr meñ hai
bas yahī rañg mire ḳhvāb kī ta.abīr meñ hai

ishq uḌānoñ kā dushman hai kyā us ko ma.alūm na thā
dil kā panchhī qaid meñ aa kar kyuuñ itnā hairān huā

hazār qaid-e-ḳhizāñ se chhuT kar bahār kā aasrā kareñge
bahār bhī ham-qafas-zadoñ ko na raas aa.ī to kyā kareñge

ek mayyat kī tarah lagtā thā
chāñd jab qaid-e-sahar se niklā

ajab vo shaḳhs hai us kī mohabbat bhī nirālī hai
jo pahle qaid kar ke ba.ad meñ āzād kartā hai

koī aa kar nahīñ jaatā diloñ ke āshiyānoñ se
rihā.ī kā koī rasta nahīñ in qaid-ḳhānoñ se

kuchh is adā se vo mere dil-o-nazar meñ rahā
ba-qaid-e-hosh bhī maiñ ālam-e-digar meñ rahā

qaid meñ hai tire vahshī ko vahī zulf kī yaad
haañ kuchh ik ranj-e-girāñ-bāri-e-zanjīr bhī thā

mujhe qaid karne kī zahmateñ na uThā.iye
nahīñ ā.ūñgā kisī jaal meñ nahīñ ā.ūñgā

kyā kahūñ darpai-e-āzār hai duniyā 'shāhīn'
aadmī qaid-e-zamāna se nikaltā hī nahīñ

tanhā.ī kī rānoñ meñ
sub.h talak maiñ qaid rahā

na qaid-e-shar.a baaqī hai na āzādī kī hai kuchh had
nahīñ kuchh guftugū is baab meñ ye nek hai yā bad

bulbul ko bāġhbāñ se na sayyād se gila
qismat meñ qaid likkhī thī fasl-e-bahār meñ

ḳhud qaid-e-vafā kaaT ke dī us ko rihā.ī
'bāno' ye tire dil kī adālat bhī ajab hai

gharoñ meñ qaid haiñ bastī ke shorafā
saḌak par haiñ fasādī aur ġhunDe

muddateñ qaid meñ guzrīñ magar ab tak sayyād
ham asīrān-e-qafas taaza giraftār se haiñ

qaid haiñ jin meñ shām-o-sahar
jis ne rakkhā qadam

maiñ divānā huuñ sadā kā mujhe mat qaid karo
jī nikal jā.egā zanjīr kī jhankār ke saath

arsa-e-qaid-e-hayāt ab vahshiyoñ par tañg hai
chaar dīvār-e-anāsir mil ke zindāñ ho ga.iiñ