Tags-Imprisonment

sūraj sitāre chāñd jo barbād ho ga.e
andhī sadā kī qaid se āzād ho ga.e

na jaane kaisī karāmat thī dast-e-sāqī meñ
ba-qaid-e-hosh koī hoshiyār bhī na milā

hañso ki surḳh o garm ḳhuun phir safed ho gayā
hañso ki nuqta-e-umīd phir ḳhalā ke dā.ere meñ aaj qaid ho gayā

shauq-e-ḳhud-ārā.ī ke hāthoñ huā
ik hayūlā qaid dīvāroñ ke biich

vo aur hoñge jo haiñ aaj qaid-e-be-samtī
vahī hai samt meñ jis samt ko nikal jā.ūñ

qaid-e-nazzāra se jalvaoñ ko nikalne na diyā
dostoñ kī ye vasī.a-un-nazarī to dekho

tilism-e-lafz-o-ma.ānī meñ qaid huuñ 'shādāb'
tamām umr mire haath se luġhat na ga.ī

mujhe to qaid-e-mohabbat aziiz thī lekin
kisī ne mujh ko giraftār kar ke chhoḌ diyā

chup rahe to shahr kī hañgāma ārā.ī milī
ab agar khole to ham ko qaid-e-tanhā.ī milī

qaid hai qaid kī mī.ād nahīñ
jaur hai jaur kī fariyād nahīñ daad nahīñ

ab ham asīr-e-zulf haiñ kis ke kisī ko kyā ġharaz
us ne to apnī qaid se ham ko bahāl kar diyā

qaid-e-zindān-e-jasad meñ thā ye kab kashf-e-vajūd
aur bhī kuchh thā maiñ sirf ik paikar-e-ḳhākī na thā

beḌiyāñ Daal ke parchhā.īñ kī pairoñ meñ mire
qaid rakhte haiñ añdheroñ meñ ujāle mujh ko

kaun yaañ qaid-e-ta.alluq meñ nahīñ
pā-ba-gul hai sarv se āzād kā

suḳhan ko be-hisī kī qaid se bāhar nikālūñ
tumhārī diid kā koī nayā manzar nikālūñ

ab 'shād' ġhazal aur kaho qaid-e-ravī meñ
is ke to sab abyāt meñ ītā-e-jalī hai

ham tumhāre aa.ine meñ qaid the
tum to bas bekār meñ ghabrā ga.e

apne aañsū dafn hue haiñ aañkh kī giilī qabroñ meñ
apnī chīḳheñ qaid rahī haiñ zehnoñ ke zindānoñ meñ

abhī to qaid se niklā huuñ un nigāhoñ kī
maiñ phir ḳhayāl ko zanjīr karne vaalā kaun

tere dīvāne ho jaate kahīñ sahrāoñ meñ kho jaate
dīvār-o-dar meñ qaid hameñ agar ahl-o-ayāl nahīñ karte