Tags-Imprisonment

hayāt-o-hijr kā ḳhud maiñ ne intiḳhāb kiyā
maiñ qaid kab thā jo maiñ qaid se rihā na huā

nizām-e-qaid-e-musalsal meñ kaisī āzādī
khule jo paañv to hāthoñ meñ hathkaḌī hogī

uḌtā huā uqaab to āñkhoñ meñ qaid hai
ab dekhiye uqaab ke aage kuchh aur hai

shab-o-roz phuul meñ jo tule kaho ḳhār-e-ġham ko vo kyā sahe
mile tauq qaid meñ jab unheñ kahā gul ke badle ye haar hai

lafz kī qaid se rihā ho jā
aa mirī aañkh se adā ho jā

yuuñ pāband-e-salāsil ho kar kaun phire bāzāroñ meñ
ḳhud hī qaid na ho jaa.eñ kyuuñ apnī hī dīvāroñ meñ

khich ke yuuñ hī kamān meñ huuñ qaid
chhūT jā.ūñ to ek tiir huuñ maiñ

qaid-ḳhāne se nikal aa.e to sahrā kā hisār
ham se TūTegī ye zanjīr-e-giraftārī kyā

paan bhī pāñdāñ meñ band rahe
itr bhī qaid itr-dān ke biich

mujhe taslīm hai qaid-e-qafas se maut behtar hai
nasheman par hujūm-e-barq-o-bārāñ kaun dekhegā

vahshiyoñ ke vāste qaid-e-libās achchhī nahīñ
zeb detā hai yahī tashrīf-e-uryānī mujhe

aks ko qaid ki parchhā.īñ ko zanjīr kareñ
sā.at-e-hijr tujhe kaise jahāñgīr kareñ

nigāh-e-ishq meñ dair-o-haram kī qaid nahīñ
kahīñ bhī sham.a jale uḌ chaleñge parvāne

dikhā.ī chashm-e-ġhazālāñ ne halqa-e-zanjīr
hameñ to gosha-e-sahrā bhī qaid-ḳhāna huā

ma.anī par koī qaid nahīñ
lafzoñ par kyuuñ pahre haiñ

ek hī ghar meñ qaid hai sultāñ
ham bhikārī nagar nagar jaa.eñ

maiñ ki bāhar kī fazā meñ qaid thā jis ke sabab
aaj vo ḳhud jins ke pinjre ke andar ho gayā

maanā ki maiñ hazār fasīloñ meñ qaid huuñ
lekin kabhī ḳhulūs se mujh ko bulā ke dekh

sab ke sab haiñ apne apne dā.ere kī qaid meñ
dā.eroñ kī had se bāhar sochtā koī nahīñ