Tags-Imprisonment

agar muqaddar kare na yaarī to farq kyā hai koī jagah ho
chalo vo qaid-e-qafas hī dekhī phuñkā huā āshiyāñ na dekhā

'ramz' qaid-e-hayāt jhel abhī
itnī ujlat mire ḳhalīl na kar

dast-e-junūñ ne qaid-e-ta.alluq se dī najāt
pahuñchā na ek ta-ba-gulū pairahan durust

gar is qaid-e-balā se ab kī chhūTeñge to phir hargiz
na ham dām-e-fareb-e-shoḳh-e-ġhārat-gar meñ āveñge

nasl-o-mazhab kī koī qaid nahīñ hai 'gauhar'
zikr har lab pe ba-alfāz-e-digar terā hai

qaid-e-maz.hab kī giraftārī se chhuT jaatā hai
ho na dīvāna to hai aql se insāñ ḳhālī

tū Thahartā nahīñ mere liye phir zid kaisī
qaid is ham-safarī kī bhī uThā de ab to

karegā kaun use sāzish-e-badan meñ sharīk
jo shaḳhs qaid abhī ruuh ke qafas meñ hai

ka.aba mahdūd hai pāband-e-sanam-ḳhāna hai
ishq har qaid-e-ḳhayālāt se begāna hai

tasvīr meñ jo qaid thā vo shaḳhs raat ko
ḳhud hī frame toḌ ke pahlū meñ aa gayā

toḌ detī haiñ beḌiyāñ aksar
qaid meñ rah ke beTiyāñ aksar

ab mujhe tāqat-e-parvāz nahīñ ai sayyād
rahne de qaid qafas se mujhe āzād na kar

āzād ho rahā huuñ do aalam ke qaid suuñ
miitā lagā hai jab satīñ muj be-navā ke haath

nazar se qaid-e-ta.ayyun uThā.ī jaatī hai
tajallī-e-ruḳh-e-jānāñ dikhā.ī jaatī hai

jism kī qaid se ik roz guzar jāoge
ḳhushk pattoñ kī tarah tum bhī bikhar jāoge

bashar ko qaid-e-kulfat māya-e-andoh-o-āfat hai
rahe achchhe jo is mehmāñ-sarā meñ aa ke kam Thahre

bas ek pal ne mujhe qaid kar liyā 'anjum'
maiñ jab giraft se us kī nikal bhī saktā thā

qaid kamre meñ ho gayā huuñ 'nabīl'
pheñk kar maiñ galī se bāhar par

āsmāñ ke taaq par sajte rahe ik ik charāġh
maiñ zamīñ kā chāñd apne hī ḳhalā meñ qaid thā

be-ruḳhī kī ghar kī dīvāroñ pe thī chūnā-kalī
zarra zarra ajnabiyyat kī fazā meñ qaid thā