Tags-Imprisonment

toḌ kar hī nikāl le koī
qaid maiñ apne dā.ere meñ huuñ

ghar meñ hamāre qaid rahā zindagī kā shor
ham be-zabān nazr-e-fuġhāñ ho ga.e to kyā

karūñ kyā bayān maiñ vasf ab mai-e-nāb-e-ishq kā dosto
ki ḳhudī kī qaid se yak-qalam ba-ḳhudā ki mujh ko chhuḌā diyā

pattharoñ ko aa.ine meñ qaid karne kā hunar
raah maiñ ne ye nikālī hai hazāroñ se alag

uThā dī qaid-e-maz.hab dil se ham ne
qafas se tā.ir-e-idrāk niklā

baize se nikālte hī sar haif
yuuñ qaid-e-qafas meñ paḌ ga.e ham

bandisheñ rūh-o-jism par ḳhush hoñ
qaid meñ bhī hai ik maza ya.anī

mar ke TuuTā hai kahīñ silsila-e-qaid-e-hayāt
magar itnā hai ki zanjīr badal jaatī hai

jab talak qaid the taqdīr pe ham rote the
aaj TuuTī huī zanjīr pe ronā aayā

phir us ne mirī ḳhū meñ mujhe qaid kar diyā
ik ḳhvāb sā lapeT diyā merī zaat par

maiñ qaid huuñ par āh-e-rasā qaid nahīñ hai
vo jail kī dīvār taḌak jaa.e to kyā ho

qaid se pahle bhī āzādī mirī ḳhatre meñ thī
āshiyāna hī mirā sūrat-numā-e-dām thā

ye qaid hai to rihā.ī bhī ab zarūrī hai
kisī bhī samt koī rāsta mile to sahī

is qaid hī meñ vus.at-e-donoñ-jahāñ milī
ye soch kar hī aaj bhī ham ḳhud meñ band haiñ

pinhā de koī mohabbat kī ek kaḌī zanjīr
ki qaid-e-farz se bāhar nikal gayā huuñ maiñ

koī ḳhvāb hai na ḳhayāl hai koī aarzū hai na justujū
ye kahāñ hai lā ke biThā diyā mujhe qaid-e-jāñ se nikāl ke

maiñ qaid meñ kabhī dīvār-o-dar kī rah na sakā
na aa sakā kabhī shahroñ kā rañg raas mujhe

nikle koī kyā qaid-e-alā.iq se ki ai 'zauq'
dar hī nahīñ is ḳhāna-e-zindāñ ke liye hai

ho qaid-e-tafakkur se kab āzād suḳhan-var
manzūr qafas murġh-e-ḳhush-alhāñ ke liye hai

vo har taraf haiñ samt kī jab qaid hī nahīñ
dair-o-haram meñ sar na jhukā.eñ to kyā kareñ