Tags-Inquilab

dekhnā hai abhī hayāt ko jashn
ik nayā inqalāb hone do

ye jānte haiñ log ki anjām kyā huā
kyoñ aayā inqalāb koī jāntā nahīñ

ragoñ meñ sirf tamavvuj kī aarzū kyā hai
jo inqalāb na laa.e to phir lahū kyā hai

ye kaisā inqalāb aayā jahān-e-be-niyāzī meñ
ki vo bhī apne dīvāne ko dīvāna nahīñ kahte

un kī mahfil meñ be-kasī merī
bā.is-e-inqalāb ho ke rahī

hamārī āñkhoñ ne har inqalāb dekhā hai
zamāna vaale hameñ kis liye Darāte haiñ

jabr ke ehsās kī āvāz to pahle bhī thī
inqalāb-e-qismat-e-ādam kā āvāza na thā

rañg-e-mahfil chāhtā hai ik mukammal inqalāb
chand sham.oñ ke bhaḌakne se sahar hotī nahīñ

dekhe haiñ is se baḌh ke zamāne ne inqalāb
jin se ki be-gunāhoñ kī umreñ huiiñ ḳharāb

tafraqa paḌtā hai jab duniyā meñ nasl-o-rañg kā
le ke maiñ aatī huuñ parcham inqilāb-o-jañg kā

vo ik sadā thī ki sadiyoñ kī guuñj thī mujh meñ
us ek lamhe meñ kyā inqalāb jhel gayā

zinda-bāsh ai inqalāb ai shola-e-fānūs-e-hind
garmiyāñ jis kī faroġh-e-manqal-e-jāñ ho ga.iiñ

tum agar DhūñDte tah-e-dil tak
rāsta inqalāb kā bhī thā

būḌhe sarkash zar-garī meñ rahzanoñ ke saath haiñ
inqalāb-e-nau kā vo pindār ab TuuTā to hai

hamāre haq meñ koī inqalāb hai ki nahīñ
hamārī samt khulā dil kā baab hai ki nahīñ

har jumbish-e-nazar meñ nihāñ tere inqalāb
mujh ko ghaTā diyā kabhī mujh ko sivā kiyā

isī kā.enāt meñ ai 'jigar' koī inqalāb uThegā phir
ki buland ho ke bhī aadmī abhī ḳhvāhishoñ kā ġhulām hai

ye shor-e-inqalāb ye nāqūs ye azaañ
hañgāma kaun sā hai tamāsha kise kaheñ

purāne vaqtoñ ke log ḳhush haiñ magar taraqqī pasand ḳhāmosh
tirī ġhazal ne kiyā hai barpā 'sahar' abhī inqilāb aadhā

vasl ke rañg bhī badalte the
hijr bhī inqalāb jaisā hai