Tags-Inquilab

jo haiñ be-amal vo haiñ bā-amal jo haiñ be-hunar vo haiñ bā-hunar
ajab inqilāb-e-zamāna hai kahīñ qadr-e-ahl-e-hunar nahīñ

inqilāb-e-dahr bar-haq lekin aisā inqalāb
vo kahīñ paa.e ga.e aur maiñ kahīñ paayā gayā

safed qalameñ huiiñ to siyah-zulf milī
ab aisī umr meñ ye inqalāb ya.anī tū

jo inqalāb na dekhā thā ham ne ai 'naḳhshab'
vo us nigāh ko apnā banā ke dekh liyā

inqalāb aa kar madad dete haiñ istedād ko
karvaTeñ badleñ lahū ne aur insāñ ho gayā

javān ḳhvāboñ ke jañgal se aa rahī hai nasīm
nafas meñ nik.hat-e-paiġhām-e-inqalāb liye

zamāna kyā dekhiye dikhā.e na jaane kyā inqilāb aa.e
falak ke tevar haiñ ḳhashm-gīñ se zamīñ ke dil meñ ġhubār sā hai

kahtā hai inqalāb zamāna jise 'falak'
ik duniyā muntazir hai usī ke zuhūr kī

koī to mashġhala-e-nā-murād jaarī ho
zabāñ ko badriqa-e-inqilāb de jaao

ye inqilāb-e-daurāñ ye aish-o-ġham ke unvāñ
goyā zabān-e-fitrat afsāna kah rahī hai

ik intizār-e-musalsal meñ din guzarte haiñ
ki aate aate na aa jaa.e inqalāb koī

kitnī mazāhiya hai ye botal ke jin kī baat
aaqā ab inqalāb hai do chaar din kī baat

qadam qadam pe hādse qadam qadam pe inqilāb
hameñ to dekho zindagī kā e'tibār kar liyā

yaqīnan inqalāb aayā hai koī
hamārā zikr aur un kī zabāñ hai

zinda lahū ke azm kī tāzīm kar na kar
ubhregā is lahū ke tamavvuj se inqalāb

'shādāñ' kī hai sadā kī palaT aa.e inqalāb
aajiz nahīñ haiñ aaj bhī farmāñ-dahī se ham

ḳhurshīd inqalāb kā ā.īna ho to ho
mizhgāñ se gir ke ashk sitārā nahīñ rahā

nigāh-e-ahl-e-dil se inqalāb aa.e haiñ duniyā meñ
yaqīñ rakh ishq itnā be-sar-o-sāmāñ nahīñ hotā

saikḌoñ inqalāb aa.e magar
dil kī duniyā idhar-udhar na huī

achānak aate haiñ girdāb jaise dariyā meñ
ik inqalāb kī āñkheñ liye avaam meñ ham