Tags-Inquilab

inqalāb aa.egā kaise ai 'zakī'
sarfaroshoñ kī kamī hai aaj kal

jahāñ pe zulm-o-sitam had se apnī baḌhte haiñ
yaqīn maano vahīñ inqalāb hotā hai

badlegā kyā nizām kab aa.egā inqilāb
jab naujavāñ lahū meñ harārat nahīñ rahī

kab tak piseñge zulm kī chakkī meñ mere log
elān-e-inqalāb kiyā kyā ġhalat kiyā

har martaba zamāne ko hotā hai inqalāb
laatī hai svāñg gardish-e-daurāñ na.e na.e

lagī hai 'saif' nazar inqilāb-e-daurāñ par
sunā to hai ki zamāne badalte rahte haiñ

sub.h-e-nau aa ga.ī tīrgī miT ga.ī shor hai har taraf inqalāb aa gayā
mujh ko Dar hai añdherā koī raat kā muñh pe Daale sahar kī naqāb aa gayā

ka.ī inqilāb aa.e ka.ī ḳhush-ḳhirām guzre
na uThī magar qayāmat tirī kam-sinī se pahle

ajab inqilāb-e-zamāna hai mirā muḳhtasar sā fasāna hai
yahī ab jo baar hai dosh par yahī sar thā zānu-e-yār par

narm uljhaneñ kam-sinī ke ḳhvāb
añg añg meñ chheḌā inqalāb

inqilāb-e-jahāñ are tauba
ham jahāñ the vahāñ nahīñ milte

kyā kaam inqalāb kā kuchh bhī nahīñ yahāñ
daur-e-falak ke daura-e-sāġhar ko ittilā.a

judā hai dard kā mafhūm lafz-e-ḳhvāb ke saath
shu.ūr-e-zāt nikhartā hai inqalāb ke saath

ye kyā kar diyā inqilāb-e-mohabbat
zarā ā.īna lā ye kyā ho ga.e ham

savāl phuul se nāzuk javāb zaḳhmoñ ke
bahut ajiib haiñ ye inqalāb zaḳhmoñ ke

dekhā ai inqilāb tujh ko
tasvīr kā ruḳh badal gayā hai

ye inqalāb bhī ai daur-e-āsmāñ ho jaa.e
mirā qafas bhī muqaddar se āshiyāñ ho jaa.e

ye shā.irī-e-nau kī paiġhambarī zamāne kī dāvarī hai
laboñ pe mere sahīfa-e-inqilāb kī surḳh āyateñ haiñ

ye inqilāb to ta.amīr ke mizāj meñ hai
girā.e jaate haiñ aivāñ bane-banā.e hue

abhī yahī inqilāb aayā hai rafta rafta
jo rone vaale the naach gānoñ meñ rah ga.e haiñ