Tags-Inquilab

vahm-o-gumāñ meñ bhī kahāñ ye inqilāb thā
jo kuchh bhī aaj tak nazar aayā vo ḳhvāb thā

usī kī ḳhātir ḳhizāñ-zada dil ne jāma-e-chāk apnā badlā
ki jashn-e-jamhūr inqilāb-e-chaman kā ā.īna-dār aa.e

tirī nazar hai jise inqalāb kahte haiñ
tirī nazar ke sivā koī inqalāb nahīñ

vahīñ se uThte haiñ har inqalāb ke bādal
vo mai-kada ki jahāñ koī inqalāb nahīñ

sab inqalāb the un kī nigāh phirne tak
ab āsmān kī gardish meñ inqalāb nahīñ

tūfān-e-inqalāb se māyūsiyoñ ke ba.ad
kashtī pukārtī hai kinārā na chāhiye

ai dil-e-ġham-āshnā ab to vo ham se chhuT ga.e
aur kyā is se ziyāda hogā koī inqalāb

sāġhar-o-mīnā paTak de toḌ de chañg-o-rubāb
dekh sar par aa chukā hai āftāb-e-inqalāb

har taraf ek āh-o-zārī har taraf ek iztirāb
kitnī sauġhāteñ liye aayā hai daur-e-inqilāb

ik qayāmat hai javānī ik qayāmat hai shabāb
har tabassum ek tūfāñ har nazar ik inqalāb

zehniyat apnī jo badal na sakeñ
'ashk' vo inqalāb kyā karte

zamāna kyā dekhiye dikhā.e na jaane kyā inqalāb aa.e
falak ke tevar meñ ḳhashmagīñ se zamīñ ke dil meñ ġhubār sā hai

kisī ġharīb kī roTī pe apnā naam na likh
kisī ġharīb kī roTī meñ inqilāb bhī hai

kisī ne naam se mere uchhālā jab patthar
ubharne lag gayā ik inqalāb us kī taraf

hamesha dair-o-haram meñ haiñ shorisheñ jis se
vo inqalāb kabhī mai-kade meñ aa na sakā

mujhe junūn-e-mohabbat ne us jahāñ meñ rakhā
ki jis jahāñ meñ koī inqalāb aa na sakā

jumūd-e-sehn-e-chaman inqalāb-e-nau kī dalīl
shu.ūr-e-ġhairat-e-ahl-e-chaman marā to nahīñ

vo jis ne sar meñ diyā inqalāb kā saudā
mire lahū ko vo baḳhshe harārateñ bhī na.ī

ye inhitāt-e-junūñ ye ḳhirad kī sust-ravī
kahīñ ye ḳhāmushī az-qabl-e-inqalāb na ho

'hātim' yahī hamesha zamāne kī chaal hai
shikva bajā nahīñ hai tujhe inqalāb kā