Tags-Inquilab

inqalāb aa.egā raftār se māyūs na ho
bahut āhista nahīñ hai jo bahut tez nahīñ

ye inqilāb-e-zamāna nahīñ to phir kyā hai
amīr-e-shahr jo kal thā vo hai faqīroñ meñ

muñh takte takte thak ga.iiñ hirmāñ-nasībiyāñ
har inqalāb-e-shauq kī himmat baḌhā gayā

ye aur baat abhī inqalāb aa jaa.e
hayāt varna abhī tak vabāl-e-jāñ hī to hai

lazzat-e-jām-e-jam kabhī talḳhi-e-zahr-e-ġham kabhī
ishrat-e-zīst hai 'asar' gardish-e-inqilāb meñ

mehmāñ hai koī dam kā zamāna shabāb kā
ruktā hai kārvāñ bhī kahīñ inqalāb kā

shab-e-visāl tulūa āftāb kaise huā
zamīñ pe itnā baḌā inqalāb kaise huā

uThā ke le gayā mujh ko giroh-e-na.ara-kashāñ
maiñ inqalāb kī jhūTī ḳhabar meñ raushan huuñ

zauq se vo sun rahe the dāstān-e-ġham mirī
ho rahā thā inqilāb-e-āsmāñ kal raat ko

'firāq' vaqt ke ruḳh se ulaT rahī hai naqāb
zamīñ se tā-ba-falak hai is inqalāb kī aañch

lā ik ḳhum-e-sharāb ki mausam ḳharāb hai
kar koī inqalāb ki mausam ḳharāb hai

jise tū ne samjhā hai zindagī usī inqalāb kā naam hai
kabhī din huā kabhī shab huī kabhī sub.h hai kabhī shaam hai

abhī hai der yahāñ inqalāb aane meñ
baḌā sukūt abhī shor-o-shar meñ baaqī hai

inqalāb is meñ hai dam dam ai dil
is kā afsos na khānā hargiz

ab inqilāb-e-zamāna kī fikr kaun kare
tirī nigāh ke māroñ ko niiñd aatī hai

koī to suud chukā.e koī to zimma le
us inqalāb kā jo aaj tak udhār sā hai

insāñ pukārtā hai koī inqalāb aa.e
patthar kī baat aur hai patthar ḳhamosh hai

hind meñ chalne lagī hai ab havā-e-inqalāb
'shād' sach hai ye jagah rahne ke ab qābil nahīñ

barahna karne lagī inqalāb kī āñdhī
qabā-e-jāh-o-hasham bhī zarā na raas aa.ī

hotā hai inqalāb jahāñ har adā ke ba.ad
bebāk bhī banoge kabhī tum hayā ke ba.ad