Tags-Inquilab

'zeb' kyā hai ye nizām-e-ġham-e-daurāñ tauba
inqilāb-e-ġham-e-daurāñ nahīñ dekhā jaatā

har ghaḌī inqalāb meñ guzrī
zindagī kis azaab meñ guzrī

būdash ik rū hai ek rū ya.anī
is kī fitrat meñ inqalāb nahīñ

ye kah rahī hai ishāroñ meñ gardish-e-gardūñ
ki jald ham koī saḳht inqalāb dekheñge

dil ye kahtā hai inqalāb karūñ
pesh us ko maiñ ik gulāb karūñ

ulaT ke rakh dī hai merī duniyā
hayāt kā inqalāb ho tum

madad de itnī taḌapne meñ inqilāb-e-jahāñ
jo mere dil meñ nihāñ hai vo rū-ba-rū aa.e

agar vahī thā to ruḳh pe vo be-ruḳhī kyā thī
zarā se hijr meñ ye inqalāb kyuuñ aayā

jab sabā aa.ī idhar zikr-e-bahār aa hī gayā
yaad ham ko inqalāb-e-rozgār aa hī gayā

aaj 'qābil' mai-kade meñ inqalāb aane ko hai
ahl-e-dil andesha-e-sūd-o-ziyāñ tak aa ga.e

ajab na thā ki zamāne ke inqilāb se ham
tayammum aab se aur ḳhaak se vazū karte

ek muddat dabī dabī rah kar
aaj tum inqalāb lagtī ho

ye daur-e-inqilāb hai ḳhud-noshiyoñ kā daur
har mai-kade meñ gardish-e-mīnā badal ga.ī

jo pesh-ḳhema bane inqalāb kā ab tak
jabīn-e-vaqt pe aisī shikan nahīñ aa.ī

habāb-āsā muhīt-e-hastī meñ jo hai miTne ko ban rahā hai
hai inqalāb ik numūd aisī jo zer-e-charḳh-e-kuhan hai baaqī

inqalāb aayā hai is tarah bhī ghar meñ akasr
dar se dīvār na dīvār se dar badlā hai

ye inqalāb hai kal maiñ ne rah dikhā.ī thī
aur aaj raah meñ ḳhud hī bhaTaktā phirtā huuñ

inqalāb aa.e to phir himmat-e-mardāñ kī qasam
vaqt kī vaqt ke ahkām se bāteñ hoñgī

abhī hai ġharīboñ kī chashm tar abhī un ke haal pe ik nazar
abe inqalāb Thahar zarā abhī tujh se aur bhī kaam hai

ham ne pilāyā ḳhuun har ik inqalāb ko
ham ko hī inqalāb kā dushman kahā gayā