Tags-Inquilab

dekh raftār-e-inqalāb 'firāq'
kitnī āhista aur kitnī tez

lo sub.h-e-inqalāb kā bhī aasrā gayā
ab kārobār-e-zīst tirā kyā ḳhayāl hai

inqilāb-e-vaqt kā ye bhī karishma dekhiye
hai numā.ish ke liye ab āñ-jahānī kā libās

hamārī bastī meñ har taraf inqalāb-e-nau kā amal thā jaarī
na jaane ye kaun sā jahāñ hai na koī aahaT na koī halchal

qālib ko apne chhoḌ ke maqlūb ho ga.e
kyā aur koī qalb hai is inqalāb meñ

rañg-e-ḳhūñ roz-e-azal se hai nishān-e-inqilāb
ziist kā unvāñ magar rañg-e-hinā kaise huā

sukūt-e-shahr-e-sitam se asīr-e-yās na ho
ki yaañ sakūñ se huā jo bhī inqalāb huā

sair kar inqilāb-e-ālam kī
Thekrā le ke jam nikaltā hai

thā jahāñ ye kuchh ayaañ vaañ inqalāb-e-daur se
yak mizha barham zadan meñ kuchh na thā vīrāna thā

tū ne ai inqalāb kyā ḳhalq kiyā
ulTā huā jo nukta nayā ḳhalq kiyā

ham bhī nigāh-e-dost se nā-āshnā nahīñ
har inqilāb-e-gardish-e-daurāñ nazar meñ hai

ye inqalāb ajab hai ki mai-kade se 'shamīm'
kidhar ye teġh-ba-kaf ho ke bāda-ḳhvār chale

kal talak dabī dabī rahī
aaj inqalāb ho ga.ī

har inqilāb mubārak har inqilāb azaab
shikast-e-jām se pahle shikast-e-jām ke baad

inqalāb aayā na jaane ye chaman meñ kaisā
ġhuncha-o-gul mujhe talvār nazar aate haiñ

ai inqalāb-e-nau ke ujāle kahāñ hai tū
saḌkoñ pe mere shahr kī kab tak dhuāñ rahe

badal diiñ inqilāb-e-vaqt ne qadreñ zamāne kī
sajāte the jo ḳhud mahfil vo ab mahfil ko rote haiñ

kitne hī inqalāb shikan-dar-shikan mile
aaj apnī shakl dekh ke maiñ dañg rah gayā

inqilāb-e-vaqt kā parcham thā mere haath meñ
zīnat-e-dār-o-rasan to merā sar honā hī thā

na jaane kaisā thā inqalāb-e-sahar kā aalam
badal rahī thī nazar ki manzar badal rahā thā