Tags-Insaan

zindagī ye dekh kar us ke sitam
maut bhī insān se ghabrā ga.ī

inqalābāt-e-tamaddun se jahāñ meñ aksar
maiñ ne dekhā hai ki insān badal jaate haiñ

kisī ke sāmne dāman pasāre se milegā kyā
agar insān ho ḳhuddāriyoñ se ghar bhare rakhiyo

maiñ ne bhī bachchoñ ko apnī nisbat se āzād kiyā
vo bhī apne hāthoñ se insān banānā bhuul gayā

ab koī DhūñD-DhāñD ke laao nayā vajūd
insān to bulandi-e-insāñ se ghaT gayā

kuchh tirī rahmat pe takiya kuchh gunāhoñ kī kashish
varna us duniyā meñ to insān jiine kā na thā

maiñ un ke rañj ke qurbāñ maiñ un ke dard ke sadqe
jo har insān ke ġham ko ḳhud apnā ġham samajhte haiñ

ajab insān huuñ ḳhush-fahmiyoñ ke ghar meñ rahtā huuñ
maiñ jis manzar meñ huuñ gum us ke pas-manzar meñ rahtā huuñ

mulamma.a-kāriyāñ ashiyā meñ bhī insān meñ bhī haiñ
zamīñ fitrat ke sāñche meñ Dhalī lagtī nahīñ mujh ko

aaj aap ko dekhā magar ab tak to sunā thā
qaa.il nahīñ hotā kabhī insān ḳhatā par

koī vaa.iz nahīñ fitrat se balāġhat meñ sivā
magar insān meñ kuchh fahm-e-ishārāt to ho

ḳhaak ke putle falak kī sarhadoñ ko chhū chuke
aur jise insān kahte haiñ abhī ġhāroñ meñ hai

huur bhī dekhe to ho jaave fidā
aaj is aalam kā vo insān hai

har ek apnā ḳhuun piye jā rahā hai aaj
insān is zamāne meñ insāñ nahīñ rahā

sab log is se pahle ki devtā samajhte
ham ne zarā sā ḳhud ko insān kar liyā hai

bah chukā hai ḳhuun paanī kī tarah insān kā
mo'tadil phir bhī mizāj-e-ālam-fānī nahīñ

merī rif.at par jo hairāñ hai to hairānī nahīñ
tū abhī insān kī azmat kā irfānī nahīñ

hotā hai insān paidā vāste fariyād ke
ye ishāra hai sarīr-e-ḳhāma-e-tahrīr kā

vo jo insān ke hī bas meñ hai us par insāñ
jaane kis muñh se shikāyāt-e-falak karte haiñ

jab qaum par aafat aa.ī ho jab mulk paḌā ho mushkil meñ
insān vo kyā mar miTne kā ehsās na ho jis ke dil meñ