Tags-Insaan

shā.irī ne mujhe insān banāyā hai 'ḳhalīl'
maiñ vo shīsha thā ki duniyā se chamaktā hī na thā

ab jo insān havāoñ meñ uḌā phirtā hai
ye kabhī peḌ ke saa.e se nikaltā hī na thā

koī andhā hī tujhe maah kahe ai ḳhurshīd
farq hotā nahīñ insān se din raat meñ kyā

detī thī zauq-e-nazar mujh ko gunah kī tarġhīb
yuuñ farishta to na thā haañ magar insān thā maiñ

taptā sūraj, ret kā dariyā, surḳh ujāle, kaalī raat
jaane kaise is dhartī par rahte haiñ insān na pūchh

purāne log dariyāoñ meñ nekī Daal aate the
hamāre daur kā insān nekī kar ke chīḳhegā

chāñd ban kar zarā insān ke māthe pe ubhar
tere jalvoñ ko tarastā hai ye tārīk samāj

manzileñ samteñ badaltī jā rahī haiñ roz o shab
is bharī duniyā meñ hai insān tanhā rāh-rau

ilm jauhar hai 'hafīz' insān kā
sach hai lekin ādmiyat aur hai

hādisa ye hai ki patthar nahīñ insān huuñ maiñ
dil mirā lāla-e-sahrā to nahīñ ho saktā

kyā marte hue log ye insān nahīñ haiñ
kyā hañste hue phūloñ meñ jāneñ nahīñ hotīñ

ham aadmī kī tarah jī rahe haiñ sadiyoñ se
chalo 'salīm' ab insān ho ke dekhte haiñ

yak-rañg kahāñ hotī hai insān kī fitrat
har phuul kī ḳhushbū hai alag rañg judā hai

ḳhudā-e-bartar tirī zamīñ par zamīñ kī ḳhātir ye jañg kyuuñ hai
har ek fat.h-o-zafar ke dāman pe ḳhūn-e-insān kā rañg kyuuñ hai

insān ye samjheñ ki yahāñ dafn ḳhudā hai
maiñ aise mazāroñ kī ziyārat nahīñ kartā

saa.e larazte rahte haiñ shahroñ kī galiyoñ meñ
rahte the insān jahāñ ab dahshat rahtī hai

insān to hai sūrat-e-haq ka.abe meñ kyā hai
ai shaiḳh bhalā kyuuñ na karūñ sajde butāñ ko

hare-bhare insān ko kaise hijr kī aag ne zard kiyā
ab bhī ishq karegā pyāre dekh to le anjām mirā

insān ke dil ko hī koī saaz nahīñ hai
kis parde meñ varna tirī āvāz nahīñ hai

kyā ho gayā insān kā vo shauq-e-shahādat
vīrān nazar aate haiñ ab dār-o-rasan bhī