Tags-Insaan

pyaar kī raah meñ aise bhī maqām aate haiñ
sirf aañsū jahāñ insān ke kaam aate haiñ

duur sunahre gumbad chamke lekin gardan kaun jhukā.e
maiñ to jannat bhī kho kar āzād-manash insān rahā huuñ

muddateñ guzrīñ to ik qatra guhar ban paayā
sadiyāñ bītīñ to kahīñ aadmī insān huā

sau rañg haiñ zindagī ke lekin
insān fareb khā rahā hai

jahāñ insān kho jaatā ho ḳhud phir us kī mahfil meñ
rasā.ī kis tarah ho daḳhl kyūñkar ho guzar kyā ho

vo zamīñ kī sarhadoñ meñ hī rahā 'anjum' muqīm
kyuuñ talāsh insān ko phir āsmānoñ meñ rahī

iḳhtilāfāt haiñ insān kā ḳhāsa 'tahsīn'
bahs karnī hai to kar bahs ko nafrat na banā

ye qatra ḳhuun kā dariyā banegā
abhī insān zer-e-tarbiyat hai

bargashta-e-yazdān se kuchh bhuul huī hai
bhaTke hue insān se kuchh bhuul huī hai

insān kī niyyat kā bharosa nahīñ koī
milte ho to is baat ko imkān meñ rakhnā

haiñ lākhoñ rog zamāne meñ kyuuñ ishq hai rusvā be-chārā
haiñ aur bhī vaj.heñ vahshat kī insān ko rakhtīñ dukhiyārā

lutf ḳhudī yahī hai ki shān-e-baqā rahūñ
insān ke libās meñ ban kar ḳhudā rahūñ

kis qadar mahdūd kar detā hai ġham insān ko
ḳhatm kar detā hai har ummīd har imkān ko

matā-e-jāñ to merī zaat kā hissa hai ik din maiñ
tū mil jā.egā to insān-e-kāmil ho hī jā.ūñgā

the muntashar azal meñ jo zarrāt-e-kū-e-dost
insān ban ke ālam-e-imkāñ meñ aa ga.e

ai shaiḳh aadmī ke bhī darje haiñ muḳhtalif
insān haiñ zarūr magar vājibī se aap

kam-nihād-o-be-sabāt insān meñ
jaane kyā kyā jam.a kar detā hai ishq

is inqalāb-e-daur-e-taraqqī ke āfrīñ
majma.a baḌā huā hai to insān ghaT ga.e

mat sahl hameñ jaano phirtā hai falak barsoñ
tab ḳhaak ke parde se insān nikalte haiñ

ruḳh se parde ko haTā husn-e-yaqīñ tak pahuñchā
āḳhir insān huuñ yuuñ aql kahāñ tak pahuñche