Tags-Intezar

us jān-e-anjuman ke liye be-qarār dil
āñkhoñ meñ intizār sajā.e hue to haiñ

vo rasm-e-shauq kahāñ ab magar ye aalam hai
ki jaise dil ko tirā intizār aaj bhī hai

vā-e-hasrat ki tere hote bhī
tere hī intizār kā aalam

shaam o sahar intizār aur maiñ
silsila-e-e'tibār aur maiñ

jo rafta rafta ġham-e-intizār kī dīmak
mire vajūd ko khaa.e to kyā kiyā jaa.e

āñkheñ khulī rahī haiñ mirī intizār meñ
aa.e na ḳhvāb dīda-e-bedār dekh kar

ham ne to intizār meñ umreñ guzār diiñ
saa.at na aa.ī husn-e-karam ke nuzūl kī

tahvīl-e-intizār meñ kab tak rahegī aañkh
mere supurd merī nazar kā ma.aal kar

girtā hai har palak ke jhapakne pe ik hijāb
āñkhoñ ko intizār sikhā.eñ to kyā kareñ

uḌ ga.e saare parinde mausamoñ kī chaah meñ
intizār un kā magar būḌhe shajar karte rahe

talāsh phir koī khoī sī rahguzār meñ thī
phir aaj ik shaam sub.h ke intizār meñ thī

kyā kam haiñ zauq-e-dīd kī jalva-farāziyāñ
āñkhoñ ko intizār-e-tamāshā na chāhiye

be-vaj.h intizār dikhāne se fā.eda
kah dījiye ki sāmne aayā na jā.egā

banñe lage haiñ daaġh sitāre ḳhushā nasīb
tārīk āsmān shab-e-intizār thā

hudūd-e-vaqt se bāhar ajab hisār meñ huuñ
maiñ ek lamha huuñ sadiyoñ ke intizār meñ huuñ

shab-e-firāq jo dil meñ ḳhayāl-e-yār rahā
pas-e-fanā bhī tasavvur meñ intizār rahā

duniyā se kho chukā hai mirā josh-e-intizār
āvāz-e-pā-e-yār ne chauñkā diyā mujhe

ḳhvāb ke sūkhe hue ḳhākoñ meñ lazzat kā ġhubār
niiñd ke dīmak-zada gatte ke pīchhe intizār

tirī nigāh-e-taġhāful se dil ne paayā hai
vo ek kaif jise intizār kahte haiñ

jalā ke ghar se raqīb sham.eñ havā meñ ham tum nikal paḌe haiñ
yahī hai donoñ ko intizār ab ki pahle kis kā diyā bujhegā