Tags-Intezar

'asar' hai aur lazzat be-ḳhudī kī
vo jān-e-intizār aa.e na aa.e

khaḌā huuñ intizār-e-yār meñ juuñ shāḳh-e-nargis maiñ
mujhe hairat hai kyuuñ āñkheñ mirī pathrā nahīñ jātīñ

ye kis ke soz kā hai bazm-e-jāñ meñ intizār ai dil
ki aaheñ aaj sū-e-ālam-e-bālā nahīñ jātīñ

khilegā dil kā phuul bhī zarā sā intizār kar
abhī ye jāñ-fazā ḳhabar sabā mujhe sunā ga.ī

khulī huī tire aane ke intizār meñ haiñ
ḳhushā-nasīb vo āñkheñ jo mahv-e-ḳhvāb nahīñ

kaTegā kaise ye vīrān be-sahārā din
abhī to sirf shab-e-intizār guzrī hai

fikr-e-ma.āl thī na ġham-e-rozgār thā
ham the jahāñ meñ aur tirā intizār thā

koī nahīñ hai intizār sub.h-e-visāl ke sivā
koī talab nahīñ mujhe tere jamāl ke sivā

kabhī na lauT ke ā.eñge aap jāntā huuñ
par aa.iye to mirā intizār dekhiyegā

vo chāñd kah ke gayā thā ki aaj niklegā
to intizār meñ baiThā huā huuñ shaam se maiñ

mirā ḳhulūs dekhnā ki mahv-e-intizār huuñ
use bhalā chukā huuñ kaif-e-intizār dekhnā

us ke va.ade kā e'tibār karūñ
phir shab-e-intizār ho jā.ūñ

tujhe kaise ilm na ho sakā baḌī duur tak ye ḳhabar ga.ī
tire shahr hī kī ye shā.era tire intizār meñ mar ga.ī

yahī nahīñ ki hamīñ intizār karte rahe
kabhī kabhī to unhoñ ne bhī intizār kiyā

sahar ke Dūbte taaro gavāh rahnā tum
ki maiñ ne āḳhirī sāñsoñ tak intizār kiyā

na koī va.ada thā un se na koī pābandī
tamām umr magar un kā intizār kiyā

kisī se rāz-e-mohabbat na āshkār kiyā
tirī nazar ke badalne tak intizār kiyā

vafā na kar to hamārī vafā kī daad hī de
tire firāq ko ham intizār kahte haiñ

dil-e-nā-tavāñ ko takān ho mujhe us kī taab na thī zarā
ġham-e-intizār se bach gayā thā naved-e-vasl se mar gayā