Tags-Intezar

banñe lage haiñ daaġh sitāre ḳhushā-nasīb
tārīk āsmān-e-shab-e-intizār thā

shab jo dil be-qarār thā kyā thā
kisī kā intizār thā kyā thā

na pūchh jab se tirā intizār kitnā hai
ki jin dinoñ se mujhe terā intizār nahīñ

hai gardish-e-zamāna meñ do-rañgī-e-hayāt
ummīd kī sahar hai to shab intizār kī

aa rahī hai phir intizār kī raat
phir diyā ek taaq par rakh de

imroz-e-intizār kā fardā to kal bhī hai
andoh-e-imshabī kā saverā kabhī na thā

kuchh na aayā hamāre kaase meñ
aur aayā to intizār aayā

tū hī batā de jamāl-e-ma.anī tirā kareñ intizār kab tak
hayāt kā e'tibār ho bhī nigāh kā e'tibār kab tak

tamām umr tire intizār meñ hamdam
ḳhizāñ-rasīda rahā huuñ bahār kar mujh ko

chhoḌ bhī ye silsila o nā-murād-e-intizār
maut baiThī hai tere bālīñ ye uktā.ī huī

ye koī baat hai utnī phailī huī zindagī meñ faqat ik tirā intizār
muntazir to tire ham raheñge magar kaise kaise hamāre safar jā.eñge

ilāhī dīda-e-hairāñ khulā na rah jaa.e
Thahar na jaa.e kahīñ intizār āñkhoñ meñ

aa ḳhalvat-e-'sarosh' meñ ai marg-e-nā-gahāñ
terā hī intizār kiyā hai tamām umr

nit tire intizār-e-ġhusl se hai
bahr ke dīda-e-hubāb meñ jaan

jā kahe kū-e-yār meñ koī
mar gayā intizār meñ koī

ḳhayāl hai ḳhizāñ meñ bhī mujhe usī bahār kā
ġhazab hai chhoḌtā nahīñ fareb intizār kā

yahī bas ek ḳhatā vaj.h-e-be-qarārī thī
jo reg-zār meñ bārāñ kā intizār kiyā

biitī raat kā phir intizār rukā
ek dam se mere kamre kā darvāza khulā