Tags-Intezar

gum-karda-e-vafūr-e-ġham-e-intizār huuñ
tū kyā chhupā ki mujh ko mujhī se chhupā diyā

chamkā kahīñ na ret kā zarra bhī rāt-bhar
sahrā-e-intizār barābar siyāh thā

nasīm-e-sub.h kā ġhunchoñ ko intizār sahī
havā-e-dasht huuñ maiñ merā intizār kise

koī hai aur bhī aa.egā jo usī jaisā
vo aa chukā hai magar intizār kaisā hai

havā ne jashn manā.e vo intizār kī raat
charāġh-e-hujra-e-furqat sambhālte guzrī

intizār ek baḌī umr kā daryūza-gar
jo bhī aatā hai koī sil yahāñ dhar jaatā hai

ājā.iyo yaar ghar se jaldī
mat kushta-e-intizār kiijo

hai mutma.in bhī to kis kis umīd-o-bīm ke saath
vo nā-murād jise lutf-e-intizār aa.e

dekhte haiñ sū-e-dar-e-gulzār
kis ke haiñ mahv-e-intizār daraḳht

baḌī talab thī baḌā intizār dekho to
bahār laa.ī hai kaisī bahār dekho to

ufuq ke us paar kar rahā hai koī mirā intizār shāyad
usī kī jānib chalī hai shaam o sahar kī ye rahguzār shāyad

tū bahut ā.indagāñ kā khīñchtā hai intizār
be-ḳhabar vo raunaq-e-ā.indagāñ dekhegā kaun

jaan ye intizār kaisā hai
hijr meñ bhī qarār kaisā hai

na intizār karo kal kā aaj darj karo
ḳhamoshī toḌ do aur ehtijāj darj karo

ye ek lamhe kī duurī bahut hai mere liye
tamām umr tirā intizār karne ko

paanī ke intizār meñ ḳhālī ghaḌe ke paas
kuchh shoḳh shoḳh rañg the kuchh dilkashī sī thī

muflisī ham ne ḳhud-kushī kar lī
maut kā intizār kyā karte

tujhe gale se lagā ke bhī dekhā jā.egā
abhī to mujh ko tirā intizār karnā hai

saare havās ke charāġh so ga.e intizār meñ
ishq to barqarār hai shauq tamām ho gayā

tire sivā bhī hazār manzar haiñ dekhne ko
tujhe na dekhūñ to kyuuñ tirā intizār dekhūñ