Tags-Intezar

tamām umr rahe merā muntazir tū bhī
tamām umr mire intizār ko tarse

marne ke ba.ad hai sag-e-jānāñ kā intizār
kah do humā na aa.e mirī ustuḳhāñ talak

aisā kiyā za.iif ġham-e-intizār ne
āñkhoñ ko merī baar hai ḳhvāb-e-girāñ talak

koī makīñ thā na mehmān aane vaalā thā
to phir kivāḌ khulā kis ke intizār meñ thā

hotī nahīñ hai merī tasallī kisī tarah
rone kā intizār hai rone ke bāvajūd

dekhte hī mai ko sāġhar kā na kheñchā intizār
maare jaldī ke maiñ apnā haath paimāna kiyā

kisī ne vāda-e-sabr-āzmā kiyā to hai
ḳhudā kare ki mujhe tāb-e-intizār rahe

kisī kī yād-e-rañgīñ meñ hai ye dil be-qarār ab tak
rahīn-e-shauq be-pāyāñ hai chashm-e-intizār ab tak

kise yaqīn ki tum dekhne ko aaoge
aḳhīr vaqt magar intizār aur sahī

bahut dinoñ se huuñ aamad kā apnī chashm-ba-rāh
tumhārā le gayā ai yaar intizār kahāñ

tire intizār meñ hai taab ye marīz-e-hijr hai jāñ-ba-lab
kahīñ aa bhī va.ada-ḳhilāf ab ki yahāñ to kaam tamām hai

maiñ ek pal ke rañj-e-farāvāñ meñ kho gayā
murjhā ga.e zamāne mire intizār meñ

tamām jism ko āñkheñ banā ke raah tako
tamām khel mohabbat meñ intizār kā hai

kuchh hī din meñ bahār aa jaatī
aur karnā thā intizār mujhe

ye jo mohlat jise kahe haiñ umr
dekho to intizār sā hai kuchh

ho chalī ḳhatm intizār meñ umr
koī aatā nazar nahīñ aatā

jal gayā dil safed haiñ āñkheñ
ye to kuchh intizār meñ dekhā

mausam-e-bahār hai ambarīñ ḳhumār hai
kis kā intizār hai gesuoñ ko kholiye

ġhurūb kā vaqt thā muqarrar so chal paḌā maiñ
kisī kā phir intizār maiñ ne nahīñ kiyā thā

kabhī to chauñk ke dekhe koī hamārī taraf
kisī kī aañkh meñ ham ko bhī intizār dikhe