Tags-Intezar

ġhurūb kā vaqt thā muqarrar so chal paḌā maiñ
kisī kā phir intizār maiñ ne nahīñ kiyā thā

tā phir na intizār meñ niiñd aa.e umr bhar
aane kā ahd kar ga.e aa.e jo ḳhvāb meñ

girāñ guzarne lagā daur-e-intizār mujhe
zarā thapak ke sulā de ḳhayāl-e-yār mujhe

kabhī dar par kabhī hai raste meñ
nahīñ thaktī hai intizār se aañkh

ik tū bachā hai shahr to saarā ujaḌ gayā
ab kar rahā hai kis kā bhalā intizār bhaag

liyā na va.ada-e-dīdār jaan kar varna
phir intizār kā yaarā hameñ kahāñ hotā

hazār kahtā rahā maiñ ki yaar ek minute
kiyā na us ne mirā intizār ek minute

chaliye qaa.em ki raftagāñ apnā
der se intizār karte haiñ

tere aane kā intizār rahā
umr bhar mausam-e-bahār rahā

vahī thiiñ aish kī rāteñ vahī the lutf ke din
kisī kī yaad kisī kā jab intizār na thā

jazā hai ġham kī to mil jaa.e aaj ai 'mānī'
ki sau ġhamoñ kā hai ġham kal kā intizār mujhe

na jaane kis kā hameñ intizār rahne lagā
ki tāq-e-dil pe diyā roz ham jalāne lage

'aḳhtar' ab intizār kī parchhā.iyāñ sameT
is dhuup meñ vo mom kā paikar na aa.egā

rishtoñ kā e'tibār vafāoñ kā intizār
ham bhī charāġh le ke havāoñ meñ aa.e haiñ

ḳhvāhish-e-dīd le ke aa.e the
hasrat-e-intizār le ke chale

aalam ik intizār kā hai
khultā nahīñ intizār kyā hai

Duube taare jhilmilā.ī sham.a shabnam ro paḌī
intizār-e-sub.h thā lo sub.h bhī hone lagī

ham kisī na.e din kā intizār karte haiñ
din purāne sūraj kā shaam baasī baasī hai

in kī bātoñ par yaqīñ ham umar bhar karte rahe
intizār-e-shām-e-va.ada umr bhar hotā rahā

qadam nikāl ab to ghar se bāhar jo dam bhī siine se sahl nikle
dikhā na ab intizār apnā lahad ko hai intizār merā