Tags-Intezar

jo hai vo kal ke savāloñ ke intizār meñ hai
ye zindagī hai ki hai raat imtihānoñ kī

shāyad ye intizār kī lau faisla kare
maiñ apne saath huuñ ki darīchoñ ke saath huuñ

rotī thiiñ zār-zār ye va.ade ne aap ke
āñkhoñ ko intizār bhī karnā sikhā diyā

ik aane vaale kā hai kab se intizār use
kaho havā se bujhā.e na us ke dar kā charāġh

hādse merā kyā bigāḌeñge
maañ kī āñkhoñ kā intizār huuñ maiñ

jab tirā intizār hotā hai
dil bahut be-qarār hotā hai

ye umar-e-hijr agar sarf-e-intizār na ho
to vāqa.ī mujhe hastī pe e'tibār na ho

dekhā jo merā hāl-e-zabūñ shām-e-intizār
apne to apne ġhair bhī namnāk ho ga.e

ye ek lamhe kī duurī bahut hai mere liye
tamām umr tirā intizār karne ko

vo thā jahāz kā panchhī na maiñ jahāz koī
na kaam sabr hī aayā na intizār aayā

mire intizār ko kyā ḳhabar tumheñ iḳhtiyār hai is qadar
mujhe do salīqa ye kam se kam ki fareb meñ bhī yaqīn ho

sar meñ vo intizār kā saudā nahīñ rahā
dil par vo dhaḌkanoñ kī hukūmat nahīñ rahī

ye ḳhauf bhī hai ki ashkoñ meñ Dhal na jaa.e kahīñ
vo ek aah jo naġhme kī intizār meñ hai

sukūñ agar hai to bas lutf intizār meñ hai
ki bebasī to ba-har-hāl iḳhtiyār meñ hai

be-talab ik justujū sī be-sabab ik intizār
umr-e-be-pāyāñ kā itnā muḳhtasar qissa bhī kyā

tujh ko hī ham se vasl kī mohlat nahīñ milī
ham ne to intizār tirā umr bhar kiyā

butoñ kī chaah meñ ham to azaab hī meñ rahe
shab-e-firāq kaTī roz-e-intizār aayā

hameñ na vasl ke qisse sunāo rahne do
hamāre haq meñ faqat intizār aayā hai

kyā ḳhabar intizār hai kis kā
sāl-hā-sāl se khaḌe haiñ peḌ

koī intizār kā fā.eda mire yaar 'bedil'-e-ġham-zada
tujhe chhoḌ kar jo chalā gayā nahīñ aa.egā nahīñ aa.egā