Tags-Ishq

duniyā meñ ḳhushī ko yaad na kar
ai ishq hameñ barbād na kar

ishq to saarī umr kā ik pesha niklā
ham ne kyā sochā thā yaaro kyā niklā

dil pe dard-e-ishq kā ek ek ehsāñ haa.e haa.e
jaan kī sūrat meñ koī dushman-e-jāñ haa.e haa.e

kyuuñ hijr ke shikve kartā hai kyuuñ dard ke rone rotā hai
ab ishq kiyā to sabr bhī kar is meñ to yahī kuchh hotā hai

husn ma.asūm nahīñ ishq pe ilzām ke baad
aap kā naam bhī aatā hai mire naam ke baad

uljhaneñ ishq meñ kuchh aur bhī baḌh jaatī haiñ
kabhī āġhāz se pahle kabhī anjām ke baad

koī vajd hai na dhamāl hai tire ishq meñ
mirā dil ki vaqf-e-malāl hai tire ishq meñ

ye jo ḳhvāb meñ bhī hai ḳhvāb kaif-o-surūr kā
tire ishq kā hī kamāl hai tire ishq meñ

maiñ nikal hī jā.ūñgā vahshatoñ ke hisār se
ye to sochnā bhī muhāl hai tire ishq meñ

āġhāz ne to ishq ke ye haal dikhāyā
ab dekhiye kyā hovegā anjām hamārā

uTTheñge abhī aur bhī tūfāñ mire dil se
dekhūñgā abhī ishq ke ḳhvāb aur ziyāda

piirī nahīñ chaltī ki faqīrī nahīñ chaltī
is ishq meñ har ek kī marzī nahīñ chaltī

husn kī dūkān ho ki ishq kā bāzār ho
yaañ koī saudā nahīñ hai dil kī daulat ke baġhair

sach batā ai jān-e-ishq o ishq-bāzāñ kyā hai tū
bin tire maiñ us badan sā huuñ ki jis meñ jaañ na ho

karam kījiye aa.iye hazrat-e-ishq
hai ḳhūn-e-jigar mehmānī tumhārī

ibtidā-e-ishq hai aur bujh rahā hai dil mirā
ho chalī dhīmī abhī se lau charāġh-e-shām kī

kabhī jo bhūle se paḌh le vo jaan hī legā
maiñ rāz-e-ishq ko yuuñ be-hisāb likkhūñgī

jo mere baad paḌhī jaa.e ek muddat tak
maiñ husn-o-ishq kī aisī kitāb likhūñgī

is se pahle ki ġham-e-ishq fuġhāñ tak pahuñche
tum ye mauqa hī na do baat yahāñ tak pahuñche

le ġham-e-ishq hamī ḳhaak hue jaate haiñ
ye to kahne ko na hogā ki fuġhāñ tak pahuñche