Tags-Ishq

kāTtā huuñ pahāḌ se din raat
mas.ala ishq hai ki ujrat hai

'mīr' bole suno 'rasā' mirzā
ishq to aaj bhī sadāqat hai

har gaam pe vo husn kī pur-hosh nigāheñ
vo ishq kā bad-mast safar yaad to hogā

vo ishq ke jazbāt kā bharpūr talātum
tūfān kī maujoñ meñ guzar yaad to hogā

ishq karne kā irāda ho to ham se milnā
tum ko ḳhud se kabhī milnā ho to ham se milnā

ishq kī dastaras meñ kuchh bhī nahīñ
jān-e-man! mere bas meñ kuchh bhī nahīñ

ishq par iḳhtiyār hai kis kā
fā.eda pesh-o-pas meñ kuchh bhī nahīñ

marte nahīñ ab ishq meñ yuuñ to ātish-e-furqat ab bhī vahī hai
taur junūñ ke badle lekin soz-e-mohabbat ab bhī vahī hai

maiñ rāh-e-ishq kā tanhā musāfir
kise āvāz duuñ koī nahīñ hai

na dil lagā ke huā mujh se ishq meñ parhez
bigaḌ gayā jo kisī ne kahā davā ke liye

mirī samt mahfil-e-ġhair meñ vo adā-e-nāz se dekhnā
jo ḳhatā-e-ishq kī hai sazā to mirī vafā kā sila bhī hai

jo hujūm-e-ġham se hai aañkh nam to laboñ pe naale haiñ dam-ba-dam
use kis tarah se chhupā.eñ ham kahīñ rāz-e-ishq chhupā bhī hai

yūñhī vaqt gañvāyā motī sā yūñhī umr gañvā.ī sonā sī
sach kahte ho tum ham-suḳhano is ishq meñ ham ne kyā paayā

hazār aa.e zamāne meñ inqalāb magar
mizāj husn kā badlā na ishq hī kā chalan

hazār baar huā imtihān-e-ishq magar
na jaane husn hai kyuuñ mujh se bad-gumāñ 'darshan'

ishq marhūn-e-hikāyāt-o-gumāñ bhī hogā
vāqi.a hai to kisī taur bayāñ bhī hogā

maiñ to marīz-e-ishq huuñ merī sehat sehat nahīñ
achchhā mujhe nahīñ kyā tum ne burā nahīñ kiyā

mujhe dushman se apne ishq sā hai
maiñ tanhā aadmī kī dostī huuñ

ham to yaañ marte haiñ vaañ us ko ḳhabar kuchh bhī nahīñ
ai vo sab kuchh hī sahī ishq magar kuchh bhī nahīñ

ishq meñ ham koī da.avā nahīñ karte lekin
kam se kam mārka-e-jāñ meñ na hāreñge tumheñ