Tags-Ishq

husn hotā hai ishq kī tasvīr
aise lamhe bhī kuchh guzarte haiñ

mire āñsuoñ pe nazar na kar mirā shikva sun ke ḳhafā na ho
use zindagī kā bhī haq nahīñ jise dard-e-ishq milā na ho

tujhe kyā batā.ūñ maiñ be-ḳhabar ki hai dard-e-ishq meñ kyā asar
ye hai vo latīf sī kaifiyat jo zabāñ tak aa.e adā na ho

ishq to ek hī se hotā hai
saarī duniyā ḳhudā nahīñ hotī

ek qatra bhī lahū jab na rahe siine meñ
tab kahīñ ishq meñ kuchh be-jigarī aave hai

shajar-e-ishq to māñge hai lahū ke aañsū
tab kahīñ jā ke koī shāḳh harī aave hai

nuqūsh-e-pā ke sadqe bandagī-e-ishq ke qurbāñ
mujhe har samt apnī hī jabīñ mālūm hotī hai

mirī rag rag meñ yuuñ to dauḌtī hai ishq kī bijlī
kahīñ zāhir nahīñ hotī kahīñ mālūm hotī hai

kyā ḳhaak hoñge ishq kī manzil se āshnā
kushta har ik qadam pe jo sūd-o-ziyāñ ke haiñ

taqdīr ke haiñ khel javāñ ishq jab huā
tab khelne ke vāste mañjhdār hī nahīñ

ishq kī qismat yahī hai ishq kā mansab yahī
jāgiye shab-bhar yūñhī aḳhtar-shumārī kījiye

ishq hai iḳhtiyār kā dushman
sabr o hosh o qarār kā dushman

jab tirī chaah meñ dāmān-e-junūñ chaak huā
phir kahīñ jā ke mujhe ishq kā idrāk huā

jaan jaa.e yaar hai dil ko rahegā pās-e-ishq
qabr meñ jā.eñge tere rāz-e-ulfat mere saath

husn sau baar chup rahe lekin
ishq phir bhī savāl kartā hai

ishq karnā use nibhā denā
dard varna behāl kartā hai

vasl ke marhale se hijr kī manzil kī taraf
ishq meñ baḌh rahe haiñ āḳhirī mushkil kī taraf

dil-shikastoñ kī davā ġhair-az gudāz-e-ishq nahīñ
hai galānā TuuTe shīshoñ ke banāne kā ilaaj

Das hī letā hai sab ko ishq kabhī
saañp mauqa.a-shanās hotā hai

ishq saanī hai to phir us meñ shikāyat kaisī
ham na kahte the ki ik zaḳhm hai bhar jaane do