Tags-Ishq

jism aisā ghul gayā hai mujh marīz-e-ishq kā
dekh kar kahte haiñ sab tāvīz hai baazū nahīñ

ishq meñ badmast huuñ maiñ par koī vāqif nahīñ
nashsha hai jām-e-mai-e-ulfat meñ lekin bū nahīñ

har sadā.e ishq meñ ik raaz hai
nāla-e-dil ġhaib kī āvāz hai

ishq ne dil ko pukārā is tarah
maiñ ye samjhā aap kī āvāz hai

mah-o-lāla-o-sham.a ke daaġh dekho
jale ishq se dūd-māñ kaise kaise

sazā-e-ishq ba-qadr-e-gunāh nā-mumkin
yahī bahut hai ki barham mizāj-e-yār rahe

baḌā dilchasp kārobār ab ke saal chal niklā
havas ke ā.īne ko ishq se chamkāte rahte haiñ

ye tire chāhne vaale bhī ajab haiñ jānāñ
ishq karte haiñ ki hotā nahīñ dekhā jaatā

ishq to zinda-e-jāved banā detā hai
ishq ke baab meñ mafhūm-e-fanā kuchh bhī nahīñ

ho gayā rāz-e-ishq be-parda
us ne parde se jo nikālā muñh

arz-e-niyāz-e-ishq ke qābil nahīñ rahā
jis dil pe naaz thā mujhe vo dil nahīñ rahā

fasurda dāġh-e-jigar dil-rubā nahīñ rahtā
charāġh ishq kā hargiz bujhā nahīñ rahtā

ye dāġh-e-ishq hai kyūñ-kar na gul khile is kā
hazār is ko chhupāo chhupā nahīñ rahtā

sach batā ishq mujhe saḳht pareshāñ huuñ maiñ
kyuuñ ḳhafā hotā nahīñ dost ḳhatā par merī

raqam hai dāstān-e-ishq-e-bulbul patte patte par
guloñ tak kis tarah gulshan meñ ye afsāna aa pahuñchā

isī zabāñ meñ hamāre bachpan ne maaoñ se loriyāñ sunī haiñ
javān ho kar isī zabāñ meñ kahāniyāñ ishq ne kahī haiñ

maraz-e-ishq jise ho use kyā yaad rahe
na davā yaad rahe aur na duā yaad rahe

ba-faiz-e-ishq karb-e-marg se 'naqsh'
guzar jaanā koī mushkil nahīñ hai

ye jo niyāz-e-ishq kā ehsās hai tumheñ
shāyad kisī ke naaz uThā.e hue ho tum

kam na thā ishq azal se rusvā
kar diyā aur bhī rusvā ham ne