Tags-Ishq

ai dil tamām naf.a hai saudā-e-ishq meñ
ik jaan kā ziyāñ hai so aisā ziyāñ nahīñ

faqr par īsār se haiñ mutma.in rūh-o-zamīr
dard-e-dil hai ḳhaas maḳhzan ishq kī jāgīr kā

ishq kī manzil meñ lākhoñ kārvāñ gum ho ga.e
rahrav-e-rāh-e-mohabbat kyā kareñge justujū

ai ishq na chheḌ aa aa ke hameñ ham bhūle huoñ ko yaad na kar
pahle hī bahut nāshād haiñ ham tū aur hameñ nāshād na kar

yuuñ zulm na kar be-dād na kar
ai ishq hameñ barbād na kar

ġhamgīñ na banā nāshād na kar
ai ishq hameñ barbād na kar

ye zulm tū ai jallād na kar
ai ishq hameñ barbād na kar

aur zabt kahe fariyād na kar
ai ishq hameñ barbād na kar

pāmāl na kar barbād na kar
ai ishq hameñ barbād na kar

mazlūm pe yuuñ be-dād na kar
ai ishq hameñ barbād na kar

ai ishq ḳhudārā dekh kahīñ vo shoḳh-e-hazīñ bad-nām na ho
vo māh-laqā bad-nām na ho vo zohra-jabīñ bad-nām na ho

us parda-nashīñ ko yaad na kar
ai ishq hameñ barbād na kar

chhoḌ aisī ḳhushī ko yaad na kar
ai ishq hameñ barbād na kar

nādān haiñ ham nāshād na kar
ai ishq hameñ barbād na kar

hai zulm magar fariyād na kar
ai ishq hameñ barbād na kar

in ḳhvāboñ sī yuuñ āzād na kar
ai ishq hameñ barbād na kar

kahtī hai hayā fariyād na kar
ai ishq hameñ barbād na kar

ehsās ko ġham buniyād na kar
ai ishq hameñ barbād na kar

ta.amīr na kar ābād na kar
ai ishq hameñ barbād na kar

ye ārzueñ ījād na kar
ai ishq hameñ barbād na kar