Tags-Ishq

ibtidā dard hai intihā dard hai
ishq kā dard to lā-davā dard hai

pyaar se ishq tak jā-ba-jā raushnī
pyaar se ishq tak jā-ba-jā dard hai

ishq kī koī tafsīr thī hī nahīñ
vāste mere taqdīr thī hī nahīñ

ye tazād-e-ishq 'ġhubār' hai koī kis tarah se samajh sake
kabhī pā-e-bāz pe sar hai ḳham kabhī āstāñ se gurez hai

andhe ke ta.iiñ 'alīm' lagā ishq kā añjan
sab vāsilāñ meñ vāsil-e-dīdār kar rakhūñ

kuchh bhī likhne kā hunar tujh ko agar mil jaa.e
ishq ko ashkoñ ke dariyā kī ravānī likhnā

kyā kahūñ tum se maiñ ki kyā hai ishq
jaan kā rog hai balā hai ishq

faqat ham ek dekhne kī chiiz ban ke rah ga.e
kisī ne aisā ishq meñ banā ke rakh diyā hameñ

tāzīr-e-jurm-e-ishq hai be-sarfa mohtasib
baḌhtā hai aur zauq-e-gunah yaañ sazā ke ba.ad

uḌāneñ le uḌeñ shahpar hamāre
mahāz-e-ishq hai aur sar hamāre

ishq ke āsār haiñ phir ġhash mujhe aayā dekho
phir koī rauzan-e-dīvār se jhāñkā dekho

dekhā na ham ne yaañ bhī shajar koī sāya-dār
ya.anī dayār-e-ishq bayābāñ se kam na thā

ḳhudā.e ishq-o-mohabbat ġhurūr 'nig.hat' dekh
nigāh-e-yār ne tasvīr kar diyā hai mujhe

mizāj-e-ishq to apnā hai e'tidāl-pasand
yahī ravish hai kabhī kam nahīñ ziyāda nahīñ

ishq meñ us ne jalānā hī nahīñ sīkhā kabhī
aag de jā.egā mujh ko ḳhud dhuāñ le jā.egā

husn aur ishq ko aao tauleñ
donoñ āñkhoñ se tarāzū kī tarah

dekhā ye jab ki yās-o-tabāhī hai hashr-e-ishq
aañsū bahā bahā ke bahut sochte rahe

kis qadar shoḳh kar diyā mujh ko
ishq miTThū-miyāñ kī chūrī hai

achchhī laḌkī zid nahīñ karte
dekho ishq burā hotā hai

ishq meñ ma.arke balā ke rahe
āḳhirash ham shikast khā ke rahe