Tags-Ishq

jahāñ bhī aa.eñ nazar chaak chaak dāman-e-dil
vo taar pairahan-e-ishq se rafū kiye jaa.eñ

ishq huā bīmārī se
āseboñ kā rizq khulā

badan se ruuh talak ham lahū lahū hue haiñ
tumhāre ishq meñ ab jā ke surḳh-rū hue haiñ

mahāz-e-jañg-e-vafā pe shikast-e-ishq ke ba.ad
paḌā hai dasht meñ ab tak vo pā.emāl badan

hameñ āḳhirat meñ 'āmir' vahī umr kaam aa.ī
jise kah rahī thī duniyā ġham-e-ishq meñ gañvā dī

zamāne ishq kī tafhīm to zarā karnā
be-rozgār batā.e kamāne vaale kā dukh

dasht-e-vahshat ko faqat qais hī bhāyā huā hai
ham ne bhī ishq kā āzār uThāyā huā hai

ishq paḌā hai pīchhe haath hī dho kar jaise
kaise apnī jaan bachā.eñ aap batā.eñ

ishq meñ ham ne jitne rañg apnā.e the
vahshī dhobī sab ko dhotā jaatā thā

mirī pyaas kā muqaddar to ye tishnagī hī Thahrī
ġham-e-ishq kī thī chhāgal maiñ chhalak ke jā rahī huuñ

ye aur baat ki dāman-darīda haiñ ham log
ba-faiz-e-ishq magar sar-kashīda haiñ ham log

apne hudūd se na baḌhe koī ishq meñ
jo zarra jis jagah hai vahīñ āftāb hai

musalsal raat din chalnā hai rāh-e-ishq meñ tanhā
kisī ke vāste ye raah āḳhir muḳhtasar kyuuñ ho

zabān-e-ishq jo kholeñ kahīñ pe sannāTe
baḌe baḌoñ kī bhī dānā.iyāñ ulajh jaa.eñ

ilaaj ishq kā karne jo aa.e chāragar
maraz meñ saarī masīhā.iyāñ ulajh jaa.eñ

ishq meñ tere jañgal bhī ghar lagte haiñ
kāñTe aur babūl sanobar lagte haiñ

ye ahd-e-ishq tire mere darmiyāñ hī rahe
ḳhudā ke vāste is meñ ḳhudā kā naam na lo

judā.ī ishq kī taqdīr hī sahī ġham-ḳhvār
magar na jaane vahāñ un kā haal kyā hogā

ik ishq meñ likh likh kar kaaTā har lafz kitāb-e-hastī kā
kar Daalā usī ne zer-o-zabar jo kaam lage thā āsāñ bhī

zabāñ meñ thī abhī luknat ki harf-e-ishq kahā
laḌakpanā thā ki zanjīr-e-ḳhadd-o-ḳhāl hue