Tags-Ishq

kabhī dasht meñ ḳhaar pe hai chalnā, kabhī aag kā phuul meñ hai Dhalnā
kabhī tanhā dhuup meñ hai chalnā, use ishq kā hī in.aam likho

vahī phir yak-qalam mansūḳh huuñ maiñ
kitāb-e-ishq jaarī ho rahī hai

īmān-o-kufr aur na duniyā-o-dīñ rahe
ai ishq-e-shād-bāsh ki tanhā hamīñ rahe

tā-chand josh-e-ishq meñ dil kī hifāzateñ
merī balā se ab vo junūnī kahīñ rahe

jā aur koī zabt kī duniyā talāsh kar
ai ishq ham to ab tire qābil nahīñ rahe

ai ishq-e-nālā-kash tirī ġhairat ko kyā huā
hai hai araq araq vo tan-e-nāznīñ rahe

sar-dādgān-e-ishq-o-mohabbat kī kyā kamī
qātil kī teġh tez ḳhudā kī zamīñ rahe

is ishq kī talāfi-e-māfāt dekhnā
rone kī hasrateñ haiñ jab aañsū nahīñ rahe

azmat-e-ishq hai pābandī-e-zabt-e-furqat
ya.anī tauhīn-e-mohabbat haiñ hamāre aañsū

tazkira is kā nahīñ ishq bachāyā kis ne
mas.ala ye thā ki ab jaan bachānī thī hameñ

vaqt ke saath badal Daale haiñ ādāb-e-vafā
aap ke ishq kī tahzīb na.ī lagtī hai

nāḳhun-e-ishq se phir sahl banā leñge tumheñ
sohbat-e-shahr meñ tum kitne hī mushkil ho jaao

ye ishq hotā hai bin sikhā.e ki us kā koī nisāb kaisā
har ik hai is raah kā musāfir faqīr kaisā navāb kaisā

tirī samt jaane kā rāsta nahīñ ho rahā
rah-e-ishq meñ koī mo.ajiza nahīñ ho rahā

kuchh na kuchh ishq kī tāsīr kā iqrār to hai
us kā ilzām-e-taġhāful pe kuchh inkār to hai

ishq kā shikva-e-bejā bhī na be-kār gayā
na sahī jaur magar jaur kā iqrār to hai

tujh se himmat to paḌī ishq ko kuchh kahne kī
ḳhair shikva na sahī shukr kā iz.hār to hai

ka.ī unvān haiñ mamnūn-e-karam karne ke
ishq meñ kuchh na sahī zindagī be-kār to hai

sahar-o-shām sar-e-anjuman-e-nāz na ho
jalva-e-husn to hai ishq-e-siyahkār to hai

chauñk uThte haiñ 'firāq' aate hī us shoḳh kā naam
kuchh sarāsīmgī-e-ishq kā iqrār to hai