Tags-Ishq

kāñTe jahāñ jahāñ pe mile rāh-e-ishq meñ
dāman bachā bachā ke nikaltā chalā gayā

qusūr ishq meñ zāhir hai sab hamārā thā
tirī nigāh ne dil ko magar pukārā thā

sanad baḳhshī hai ishq-e-be-ġharaz kī
bahut hī shaad farmāyā gayā hai

ishq o mohabbat kyā hote haiñ kyā samjhā.ūñ vaa.iz ko
bhaiñs ke aage biin bajānā mere bas kī baat nahīñ

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

maktab-e-ishq meñ baiThā huā hal kartā huuñ
jaise algebra ke milte haiñ savālāt mujhe

dard-e-dil ishq meñ hai kaahe se sekūñ maiñ 'zarīf'
na falālīn hī miltī hai na bānāt mujhe

hastī-e-ishq ko ab tak na koī jaan sakā
varna hai dahr meñ kyā aur mohabbat ke sivā

garche kyā kuchh the magar aap ko kuchh bhī na ginā
ishq-e-barham zan-e-kāshāna-e-pindār rahā

ātish-e-ishq meñ jaltā rahā bujhtā rahā dil
rañj-e-betāb se dariyā kabhī sahrā rahā dil

ishq aur vasl do ruḳh ik tasvīr
raa.ī ko to samajh rahī hai pahāḌ

abhī kal hī kī baat hai jān-e-jahāñ yahāñ fiil ke fiil the shor-kunāñ
ab nāra-e-ishq na zarb-e-fuġhāñ ga.e kaun nagar vo vafā ke dhanī

is ishq ke dard kī kaun davā magar ek vazīfa hai ek duā
paḌho 'mīr'-o-'kabīr' ke bait kabit suno sher-e-'nazīr' faqīr-o-ġhanī

husn be-vāsta-e-zauq-e-ḳhud-ārā.ī thā
ishq be-vāhima-e-lazzat-e-rusvā.ī thā

parda-dar koī na thā aur na dar-parda koī
ġhairat-e-ishq na thī ālam-e-tanhā.ī thā

fitna-zā husn huā ishq huā shor-e-fagan
ram huā shauq-fazā shauq tamannā.ī thā

husn kī bevafā.iyāñ tauba
ishq kī sar-girāniyāñ tauba

to phir vo ishq ye naqd-o-nazar barā.e-faroḳht
suḳhan barā.e-hunar hai hunar barā.e-faroḳht

tujh ishq ke soz meñ sarāpā
jiyūñ sham-e-gudāz ho ga.e ham

ai ishq ba-qaul-e-'dard' sach hai
kuchh laa.e na the ki kho ga.e ham