Tags-Ishq

ye maqām-e-ishq hai kaun sā na shikāyateñ haiñ na shukriya
jo tire sitam pe nisār the vo tire karam se bhī Dar ga.e

'mīr'-sāhib ko muñh dikhānā thā
maz.hab-e-ishq iḳhtiyār kiyā

ham ahl-e-ishq haiñ 'shā.ir' hameñ ye hosh kahāñ
kise itaab kise iltifāt kahte haiñ

ishq ne is dil ko dam lene kī fursat hī na dī
ek jab armān niklā dūsrā paidā huā

ishq āzār hī rahā merā
husn ījād kaun kartā hai

rañg bharne kī haiñ bāteñ sabhī afsāne meñ
ishq meñ kaun bhalā kis se judā hotā hai

ġham-e-ishq meñ kaarī davā na duā ye hai rog kaThin ye hai dard burā
ham karte jo apne se ho saktā kabhī ham se bhī kuchh na kahā tum ne

kabhī na phuul se chehre pe gard-e-yās jame
ḳhudā kare ki use ishq kī havā na lage

ishq karnā bhī lāzmī hai magar
mujh pe ghar kī bhī zimmedārī hai

chaḌh ke taazī ishq kā nit 'man-araf' kā sair kar
'qad-araf' kā pahuñch ai dil mahl-o-maskan bhuul jā

da.ave tumhāre ishq ke bātil hue sabhī
paañv ke zaḳhm dasht kī pahnā.ī bech dī

ishq hai aur kāñToñ kā bistar husn hai aur phūloñ kī sej
tujh ko kaise samjhā.ūñ ye duniyā kā dastūr hai chāñd

ishq-bāzī kā muñh chiḌānā hai
aur vo mausam nahīñ shabāb nahīñ

chhuptā nahīñ hai dil meñ kabhī raaz ishq kā
ye aag vo hai jis ko nahīñ taab sañg meñ

saudā-e-ishq yaañ to hai sar meñ bharā huā
nām-e-junūñ se karte haiñ visvās aur log

āzād-gān-e-ishq har ik haal meñ haiñ shaad
hoñge asīr-o-ranj-o-ġham-o-yās aur log

qāmat-e-jāñ ko ḳhush aayā thā kabhī ḳhil.at-e-ishq
ab isī jāma-e-sad-chāk se ḳhauf aatā hai

husn kā anjām dekheñ ahl-e-husn
ishq merā be-haqīqat hī sahī

rah-e-ishq dushvār hai kis qadar ye
kabhī pūchh dekho to mujh dar-ba-dar se

vo rāh-e-ishq meñ dil kī ma.āl-andeshī
vo merī aql kī nādāniyāñ ma.āz-allāh