Tags-Ishq

kabhī thā dār-e-vafā kū-e-ishq aur ab hai
qimār-ḳhāna-e-sūd-o-ziyāñ ma.āz-allāh

merā maz.hab ishq kā maz.hab jis meñ koī tafrīq nahīñ
mere halqe meñ aate haiñ 'tulsī' bhī aur 'jāmī' bhī

ik sāñvle badan se mohabbat qubūl kar
ai rabb-e-ishq dil kī shahādat qubūl kar

dil ne abhī bichā.ī hai jā-e-namāz-e-ishq
luknat-zada zabāñ kī iqāmat qubūl kar

mirī āñkhoñ meñ jo thoḌī sī namī rah ga.ī hai
bas yahī ishq kī sauġhāt bachī rah ga.ī hai

dasht chhānegā tirī ḳhaak mohabbat se 'sa.īd'
ishq dekhegā tujhe saare kā saarā kar ke

mere tasavvurāt haiñ tahrīreñ ishq kī
zindānī-e-ḳhayāl haiñ zanjīreñ ishq kī

ta.abīr-e-husn hai dil-e-majrūh kā lahū
chhīñTe paḌe to ban ga.iiñ tasvīreñ ishq kī

dāġh-e-firāq zaḳhm-e-vafā ashk-e-ḳhūñ-fishāñ
roz-e-azal se haiñ yahī jāgīreñ ishq kī

shām-e-ḳhizāñ ko sub.h-e-bahārāñ banā diyā
tartīb-e-zīst ban ga.iiñ ta.azīreñ ishq kī

'sāġhar' jahān-e-shauq meñ dekhī hai jāvedāñ
ahl-e-nazar ke sāmne tafsīreñ ishq kī

hai ham pe tohmat-e-maraz-e-ishq 'azfarī'
ham tum haiñ dekho Thanī se chañge bhale khaḌe

rahā ishq se naam majnūñ kā varna
tah-e-ḳhāk haiñ be-nishāñ kaise kaise

ġham-e-ishq hī ne kaaTī ġham-e-ishq kī musībat
isī mauj ne Duboyā isī mauj ne ubhārā

'mus.hafī' sālikān-e-ishq kā hai
aisī manzil pe intihā-e-qadam

tū talāsh kar koī aur ilāj-e-dil-e-hazīñ
ki davā-e-ishq ke muzmirāt ajiib haiñ

havā bhī ishq kī lagne na detā maiñ use hargiz
agar is dil pe hotā haa.e kuchh bhī iḳhtiyār apnā

dil ġham-e-ishq ke iz.hār se katrātā hai
aah ġham-ḳhvār ki ġham-ḳhvār se katrātā hai

ho rahā hai mujhe takmīl-e-mohabbat kā gumāñ
ishq ab husn ke dīdār se katrātā hai

har ek tadbīr be-asar hai na jī rahī huuñ na mar rahī huuñ
junūn-e-ishq-e-ḳhudā hī logo ye haal merā banā rahā hai