Tags-Ishq

ye chiñgārī bhaḌak uTThegī ik din
miyāñ ye ishq hai ho kar rahegā

ishq ek sīdhī-sādī sī mantiq kī baat hai
raġhbat mujhe huī to vo marġhūb ho gayā

ik e'tirāf-e-ishq thā jo kar nahīñ sakī
ḳhāmosh is liye huuñ ki sachchī nahīñ rahī

ishq se paidā navā-e-zindagī meñ zer-o-bam
ishq se miTTī kī tasvīroñ meñ soz-e-dam-ba-dam

aadmī ke reshe reshe meñ samā jaatā hai ishq
shāḳh-e-gul meñ jis tarah bād-e-sahar-gāhī kā nam

ho gayā shāmil ġharaz kā rañg mauj-e-ishq meñ
jhiil ke nithre hue paanī meñ gaarā mil gayā

na ḳhushī meñ ab vo surūr hai na to dard meñ vo nasha rahā
lo 'sahāb' bāda-e-ishq ke vo sabhī ḳhumār chale ga.e

ye husn-o-ishq kā hai ittihād-e-yak-rañgī
vahī hai marzī-e-mahmūd jo ayaaz kare

tañg aa ga.e haiñ ishq meñ ab zindagī se ham
aa.e qazā to nazr kareñ jaañ ḳhushī se ham

sāhib-e-ishq ab itnī sī to rāhat mujhe de
ghar banā yā dar-o-dīvār se ruḳhsat mujhe de

ishq meñ sabr-o-razā darkār hai
fikr-e-asbāb-e-vafā darkār hai

zulf kuuñ vā kar ki shāh-e-ishq kuuñ
sāya-e-bāl-e-humā darkār hai

ai ishq na farhād bachā tujh se na parvez
bā-ḳhāk barābar tū kiyā nā-kas-o-kas ko

ishq kā rog lagā hai ka.ī barsoñ se mujhe
kis liye mujh ko ye phir duniyā davā detī hai

huā hai ishq meñ ḳhāsān-e-haq kā rañg safed
ye qatl-e-ām nahīñ shoḳhi-e-hinā kahiye

'jauhar' is ek dil ke liye itne mashġhale
kī hai ḳhudā kī chaah to ishq-e-butāñ na ho

kaise tum se ishq huā thā kyā kyā ham par biit rahī hai
sun lo to sachchā afsāna varna ek kahānī hai

basān-e-naqsh-e-qadam jis ne pā-turāb kiyā
vo rāh-e-ishq meñ miT kar ġharaz shitāb uThā

qimār-e-ishq meñ sab kuchh gañvā diyā maiñ ne
umīd-e-nafa.a meñ ḳhauf-e-ziyāñ nahīñ hotā

jahāñ fareb ho 'majzūb' ye tirī sūrat
butoñ ke ishq kā tujh par gumāñ nahīñ hotā