Tags-Ishq

amal kuchh aisā kiyā adū ne ki ishq bāham lagā chhuḌāyā
ilāhī chhuT jaa.eñ us kī nabzeñ milāp jis ne mirā chhuḌāyā

jazba-e-junūn-e-ishq go bahut purānā hai
phir bhī tāza-tar hai ye phir bhī vālihāna hai

kuchh milte haiñ ab puḳhtagi-e-ishq ke āsār
nāloñ meñ rasā.ī hai na aahoñ meñ asar hai

kitne uruuj par hai mire ishq kā vaqār
hāsil haiñ kū-e-yār kī rusvā.iyāñ mujhe

ḳhaak jhelegā vo musībat-e-ishq
jo lagā kar na phir bujhā jaane

likh rahe ye ishq kī ham dāstāñ
dard kā shahkār ho kar rah ga.ī

husn faanī hai maslahat-āmez
ishq ko kāmyāb honā thā

log kyā kyā na ishq meñ 'jāzib'
chhoḌ kar naam aur nasab aa.e

mirī tarah to nahīñ us ko ishq kā āzār
ye zard rahtī hai kyuuñ za.afarāñ nahīñ ma.alūm

supurd kis ke mire ba.ad ho amānat-e-ishq
uThā.e kaun ye bār-e-girāñ nahīñ ma.alūm

tarīq-e-ishq meñ dīvāna-vār phirtā huuñ
ḳhabar gaḌhe kī nahīñ hai kuaañ nahīñ ma.alūm

ishq aur ishq ke ādāb kā kyā karnā hai
tū nahīñ hai to kisī ḳhvāb kā kyā karnā hai

ai ishq tirī raah meñ ham chal to rahe haiñ
kuchh marhale aise haiñ jo āsāñ nahīñ hote

maiñ mubtalā-e-ishq huuñ mujh ko patā na thā
jab tak kisī ne haal ye merā kiyā na thā

allāh tere ishq meñ huuñ haal se behāl
tab tak baḌe maze meñ thī jab dil lagā na thā

dil kā khonā bahut zarūrī hai
ishq honā bahut zarūrī hai

ḳhauf kā mafhūm pahlī baar samjhā ishq meñ
baat hotī kuchh nahīñ aur jaan ko aa jaa.e hai

dāva-e-ishq-o-vafā par ye kahā
sab bajā lekin mire kis kaam ke

kyūñkar na sahl ho mujhe rāh-e-dayār-e-ishq
laayā huuñ dasht-e-najd kā naqsha uThā ke maiñ

ishq ke paañv paḌā aur use arz kare
sāhibā ab to mujhe apnā taraf-dār samajh